روم: اٹلی میں پیزا کھانے کے شوقین افراد نے دنیا کا سب سے طویل پیزا بنا کر عالمی ریکارڈ بنا لیا۔
غیر ملکی خبر رساں ادارے کے مطابق اٹلی کے شہر نیپلز میں 100 باورچیوں نے 1853 میٹر لمبا پیزا بنا لیا۔ گنیز بک آف ورلڈ ریکارڈ نے بھی تصدیق کردی کہ یہ دنیا کا سب سے بڑا پیزا ہے۔
اس پیزا کو بنانے کے لیے 2000 کلو گرام آٹا، 1600 کلو ٹماٹر، 2000 کلو گرام پنیر اور 200 لیٹر زیتون کا تیل استعمال کیا گیا جنہیں مقامی مارکیٹوں سے خریدا گیا۔
اس پیزا کو بنانے میں ماہر باورچیوں کے 11 گھنٹے لگے جبکہ اس کے لیے خاص طور پر 5 بڑے چولہے بنائے گئے۔
گنیز بک آف ورلڈ ریکارڈ انتظامیہ کی ایک رکن وہاں موجود تھیں۔ ان کی تصدیق کے بعد یہ پیزا عام لوگوں میں بانٹ دیا جائے گا۔ بچ جانے والا پیزا اطالوی ریڈ کراس سمیت دیگر فلاحی تنظیموں کو دے دیا جائے گا تاکہ اسے ضرورت مندوں میں تقسیم کیا جاسکے۔
