امریکا کے شہر لاس اینجلس کے جنگلات میں آگ لگنے کی وجوہات جاننے کے لیے تحقیقات شروع کردی گئی ہیں۔
بین الاقوامی خبر رساں ادارے کی رپورٹ کے مطابق فیڈرل بیورو آف الکوحل ٹوبیکو ایند فائر آرمز ہونے والی تحقیقات کی قیادت کے فرائض انجام دے رہی ہے۔
اے ٹی ایف کے عہدیدار جوز میڈینا کے مطابق ہم جانتے ہیں کہ ہر کوئی جواب چاہتا ہے، کمیونٹی جواب کا حق رکھتی ہے، مگرآگ لگنے کی وجوہات پر ابھی کچھ کہنا قبل از وقت ہو گا۔
اُنہوں نے کہا کہ اے ٹی ایف مکمل تحقیقات کے بعد ہر سوال کا جواب دے گی، اے ٹی ایف مقامی لا انفورسمنٹ، فارسٹ سروس اور یو ایس اٹارنی کے ساتھ کام میں مصروف ہے۔
اُنہوں نے کہا کہ آگ بھڑکنے کے 2 مقامات کی تلاش کے لیے مختلف شعبوں کے ماہرین امور انجام دے رہے ہیں، انکوائری کے عمل میں کم از کم 75 افراد حصہ لے رہے ہیں۔
واضح رہے کہ لاس اینجلس میں لگنے والی آگ سے کئی المناک داستانیں جنم لے رہی ہیں اس آگ کے شعلوں نے مشہور ہالی ووڈ اداکارہ کو بھی نگل لیا۔
آگ پر ایک ہفتہ گزرنے کے باوجود قابو نہیں پایا جا سکا ہے۔ اب تک 40 ہزار سے زائد ایکڑ رقبہ جل کر بھسم، 12 ہزار سے زائد گھر خاکستر اور 30 کے قریب افراد ہلاک ہوچکے ہیں جب کہ لاکھوں نقل مکانی پر مجبور ہوئے ہیں۔
اس ہولناک آتشزدگی کا ایک اور روح فرسا واقعہ اس وقت سامنے آیا جب شمالی لاس اینجلس کے علاقے الٹاڈینا میں ہالی ووڈ کی ماضی کی نامور اداکارہ ڈیلیس کی آگ سے جل کر خاکستر ہوئی لاش کی باقیات ملیں۔
بلوز برادرز، لیڈی سنگز دی بلوز اور دی 10 کمانڈمنٹس جیسی فلموں میں اہم کردار نبھانے والی 95 سالہ اداکارہ ڈیلیس کی موت کی تصدیق کیلی نے کی اور فیس بک پوسٹ پر بتایا کہ ان کی دادی کی باقیات گھر سے ملی ہیں۔
کیلی نے ایک کلپ میں جلی ہوئی سائیکل، ریفریجریٹر، دروازہ دکھایا اور بتایا کہ انہوں نے اپنی دادی کو آخری بار اس وقت دیکھا جب وہ انہیں منگل کی آدھی رات کو ان کے الٹاڈینا والے گھر چھوڑ کر آئیں۔
لاس اینجلس میں تیز ہوائیں، آگ مزید بڑھنے کا خدشہ
اداکارہ کی پوتی کا کہنا تھا کہ اس وقت آگ کی شروعات ہوئی تھیں لیکن دو پہاڑوں کے درمیان لگی آگ اتنی خطرناک محسوس نہیں ہو رہی تھی۔ میں اپنے کینسر سے متاثرہ بہن بھائی کی دیکھ بھال کے لیے دادی کو وہاں چھوڑ کر واپس آ گئی تھی۔
