کیا آپ پستہ قد ہیں اور اپنا وزن گھٹانا چاہتی ہیں؟ تو پھر آپ کے لیے ایک بری خبر ہے۔
ماہرین کا کہنا ہے کہ پستہ قد خواتین کو وزن کم کرنے میں اوسط قد رکھنے والی خواتین کی نسبت زیادہ مشکل کا سامنا کرنا پڑ سکتا ہے۔ اس تحقیق کی بنیاد اوسط قد، جسم اور میٹابولزم کی مقدار پر رکھی گئی۔
ماہرین کے مطابق دنیا بھر میں خواتین کا اوسط قد 5 فٹ 6 انچ ہے۔ اسی طرح اس اوسط قد کے حساب سے میٹا بولزم یعنی کیلیوریز کے جلنے، خلیوں کے ٹوٹنے اور دوبارہ بننے کا عمل بھی اوسطاً انجام پاتا ہے۔
مزید پڑھیں: پستہ قد افراد میں غصے اور تشدد کا رجحان زیادہ
اس قد کی خواتین میں کیلیوریز کے جلنے کی اوسط مقدار 14 سو روزانہ ہے۔ یہ وہ کیلوریز ہیں جو بغیر کوئی حرکت یا ورزش کیے بغیر بھی خودبخود ختم ہوجاتی ہیں۔
تاہم چھوٹے قد کی خواتین میں یہ تعداد کم ہو کر 12 سو ہوجاتی ہیں جبکہ لمبے قد کی خواتین میں یہ تعداد 17 سو 50 کیلوریز تک جا پہنچتی ہیں۔
ماہرین کے مطابق میٹا بولزم کی یہ تعداد پستہ قد خواتین میں وزن کی کمی نہایت مشکل عمل بنا دیتی ہے۔
ان کا کہنا ہے کہ پستہ قد خواتین کو صرف اپنی بھوک کے حساب سے کھانا چاہیئے جبکہ انہیں صحت بخش غذا کھانا چاہیئے تاکہ ان کی غذائی ضروریات پوری ہوسکیں اور جسم کو درکار توانائی مل سکے۔
