بھارت میں نوجوان نے ایک ہی وقت میں دو لڑکیوں سے شادی رچالی۔
بھارت کی ریاست تلنگانہ کے ضلع کومرم بھیم آصف آباد میں نوجوان نے ایک ہی وقت اور منڈپ میں دو لڑکیوں سے شادی کرلی جس کی ویڈیو سوشل میڈیا پر وائرل ہوگئی۔
سوریا دیو نامی نوجوان کا کہنا ہے کہ وہ لال دیوی اور جھلکاری دیوی دونوں سے محبت کرتا تھا اور اسی لیے اس نے ایک تقریب میں دونوں سے شادی کا فیصلہ کیا۔
سوریا دیو نے شادی کے دعوت نامے پر بھی دونوں دلہنوں کے نام چھپوائے اور ایک شاندار تقریب کا اہتمام کیا۔
وائرل ویڈیو میں دیکھا جاسکتا ہے کہ دونوں دلہنیں دلہے کا ہاتھ پکڑے منڈپ میں آگ کے گرد پھیرے لینے کی رسم ادا کررہی ہیں جبکہ گھر والے، رشتے دار اور گاؤں والے بھی موجود ہیں۔
سوریا دیو جب لال دیوی اور جھلکاری دیوی دونوں سے محبت کرنے لگا تو تینوں نے ایک ساتھ رہنے کا فیصلہ کیا پہلا گھر کے بزرگوں نے اعتراض کیا لیکن پھر وہ راضی ہوگئے اور شادی میں مدد بھی کی۔
واضح رہے کہ بھارت میں ہندوؤں کے لیے ایک وقت میں ایک سے زیادہ شادیاں کرنا غیرقانونی ہے۔
اس سے قبل 2021 میں بھی تلنگانہ کے عادل آباد ضلع میں ایک شخص نے ایک ہی منڈپ میں دو خواتین سے شادی رچائی تھی جس کی ویڈیو وائرل ہوگئی تھیں۔
