برلن : جرمن ایئرلائن لفتھانزا کے ملازمین نے کام چھوڑ ہڑتال کردی، جس کے نتیجے میں ایک ہزار سے زائد پروازیں منسوخ ہوگئیں۔
غیر ملکی خبر رساں ادارے کی رپورٹ کے مطابق مذکورہ ہڑتال جرمنی میں موجود ملازمین کی جانب سے تنخواہوں میں اضافہ نہ ہونے کیخلاف کی جا رہی ہے۔
رپورٹ کے مطابق ہڑتال کی وجہ سے نہ صرف ہزاروں مسافروں کو مشکلات درپیش ہیں بلکہ کمپنی کو بھی بڑے مالی نقصان کا سامنا کرنا پڑرہا ہے۔
ملازمین کی ہڑتال کے سبب 134,000 کے قریب مسافروں کو اپنا سفری پروگرام تبدیل یا پھر بالکل ہی منسوخ کرنا پڑا۔
جرمن خبر رساں ادارے ڈی پی اے کے مطابق 47 پروازیں تو منگل کو ہی منسوخ کر دی گئیں۔ لفتھانسا ایئرلائن کے بڑے مراکز فرینکفرٹ اور میونخ سب سے زیادہ متاثر ہیں جبکہ ڈوسلڈورف، ہیمبرگ برلن، بریمن، ہیننور، اشٹٹگارٹ اور کولون سے بھی پروازیں منسوخ کی گئی ہیں۔
ایئرلائن نے متاثرہ مسافروں سے کہا ہے کہ وہ ایئرپورٹس پر نہ جائیں کیونکہ وہاں موجود زیادہ تر کاؤنٹرز پر عملہ موجود ہی نہیں ہے، لفتھانسا کے ترجمان مارٹن لوئٹکے نے اس ہڑتال پر تنقید کرتے ہوئے اسے نقصان دہ قرار دیا ہے
