کراچی : لیاری میں گزشتہ روز فائرنگ سے جاں بحق ہونے والے رکشہ سوار لڑکا لڑکی دراصل میاں بیوی تھے، پولیس نے مقدمہ درج کرکے قاتلوں کی تلاش شروع کردی۔
اس حوالے سے پولیس حکام کا کہنا ہے کہ کراچی کے علاقے لیاری میں غیرت کے نام پر فائرنگ سے قتل کیے گئے لڑکا، لڑکی میاں بیوی نکلے۔
میاں بیوی کو لیاری میوہ شاہ مسجد کے قریب گزشتہ روز رکشے پر فائرنگ کرکے قتل کیا گیا تھا، جن کی شناخت ہوگئی ہے۔
پولیس نے مقتول کے خالہ زاد بھائی اسفند یار کی مدعیت میں نامعلوم ملزمان کیخلاف مقدمہ درج کرلیا ہے، مقدمے کے متن میں کہا گیا ہے کہ مقتولین نے پسند کی شادی کی تھی جس سے متعلق جرگہ بھی ہوا تھا۔
باجوڑ ایجنسی کے علاقے میں منعقد ہونے والے جرگے کے فیصلے پر مقتولین کو علاقہ بدر کردیا گیا تھا، جنہیں دو سال بعد موت کے گھاٹ اتار دیا گیا۔
غیرت کے نام پر قتل ہونے والے میاں بیوی گذشتہ 2سال سے لیاری میں رہائش پذیر تھے، پولیس نے قاتلوں کو تلاش کیلیے کارروائی کا آغاز کردیا۔
