گورنر سندھ عمران اسماعیل نے لیاری سے منتخب تحریک انصاف کے رکن قومی اسمبلی شکورشاد کو یقین دہانی کروائی ہے کہ لیار ی کے تمام مسائل کو ترجیحی بنیادوں پر حل کیا جائے گا۔
گورنرسندھ عمران اسماعیل سے رکن قومی اسمبلی عبدالشکور شاد نے ملاقات کی جس میں سیاسی صورتحال اور لیاری کے مسائل پر تفصیلی گفتگو کی گئی۔
گورنر سندھ نے کہا کہ لیاری کی ترقی کے لئے تمام تر ممکنہ وسائل بروئے کار لائے جائیں گے اور تمام مسائل کو ترجیحی بنیادوں پر حل کیا جائے گا۔
عمران اسماعیل نے کہا کہ حکومت کو لیاری کی مشکلات کا احساس ہے اور جلد از جلد مثبت اقدامات ممکن بنائے جائیں گے باالخصوص لیاری کے نوجوانوں کو قومی دھارے میں شامل کیا جائے گا۔
رکن قومی اسمبلی عبدالشکور شاد نے اپنی اور لیاری کے مکینوں کی جانب سے علاقے کے مسائل پر توجہ دینے پر گورنر سندھ کا شکریہ ادا کیا۔
واضح رہے کہ شکورشاد وفاقی حکومت سے ناراض ہوگئے تھے شکورشاد نے بجٹ میں لیاری کو نظرانداز کرنے پر اجلاس میں شرکت نہ کرنےکا فیصلہ کیاتھا۔ شکورشاد کا کہنا تھا کہ وفاق کی مسلسل نظراندازی پر دلبرداشتہ ہو کر گھر بیٹھ گیا ہوں۔
انہوں نے کہا کہ لیاری سے بلاول کوشکست دینےوالے کو وفاقی وزیر ہونا چاہیے تھا جمعہ کےدن وزیراعظم عمران خان سے ملاقات ہوئی تھی لیکن وزیراعظم کی طرف سےلیاری کےمنصوبوں کو اہمیت نہیں دی گئی۔
