کراچی : سندھ کے سب سے بڑے سول اسپتال کراچی کے نیورولوجی او پی ڈی سے لاکھوں روپے کی مشینری چوری ہوگئی۔
تفصیلات کے مطابق سندھ کے سب سے بڑے سول اسپتال کراچی میں سیکورٹی کی ناقص صورتحال ہے، سول اسپتال نیورولوجی او پی ڈی سے لاکھوں روپے کی مشینری چوری ہوگئی۔
چوروں نے او پی ڈی میں توڑ پھوڑ بھی کی لیکن سرکاری و پرائیویٹ گارڈزلاعلم رہے۔
دو روز سرکاری چھٹی کی وجہ سے سول اسپتال کی او پی ڈی بند تھی ، آج او پی ڈی کھلنے پر سامان غائب ہونے پر انتظامیہ نے سیکیورٹی کو طلب کرلیا۔
سول اسپتال کی اوپی ڈی کے احاطے میں چوری کے معاملے پر ایم ایس نے بتایا کہ ہیروئن کے عادی افراد نیورولوجی ڈپارٹمنٹ کی کھڑکی توڑ کر اندر داخل ہوئے، منشیات کے عادی شخص نے ڈپارٹمنٹ سے ایک پرانا پنکھا چرایا۔
ایم ایس کا کہنا تھا کہ اسپتال کے اندر ایک پولیس کی چوکی بھی قائم ہے، چوری ہونے والے سامان میں غیر استعمال شدہ پنکھا ہے تاہم نیورولوجی ڈپارٹمنٹ سے پنکھا چوری کی اطلاع متعلقہ پولیس تھانے کو کردی ہے۔
دو روز سرکاری چھٹی کے بعد سول اسپتال کی او پی ڈی میں آنے والے مریض شدید پریشان ہے۔
