بالی ووڈ کی آنجہانی اداکارہ مودھو بالا کی بہن مدھور برج بھوشن نے فلم سازوں کو بہن کی زندگی پر فلم بنانے سے خبردار کردیا۔
بھارتی میڈیا سے گفتگو کرتے ہوئے مدھور برج بھوشن نے کہا کہ مدھوبالا کی زندگی پر فلم بنانا ان کے خاندان کا قانونی حق ہے۔
انہوں نے فلم سازوں کو خبردار کرتے ہوئے کہا کہ کوئی بھی مدھوبالا کی زندگی پر فلم میری منظوری کے بغیر نہیں بنائے گا۔
مدھولا کی بہن نے کہا کہ برائے مہربانی یہ لمحہ ہمارے لیے خراب مت کریں، اگر کسی نے میری درخواست نہ مانی تو مجھے مجبوراً ان پر جذباتی اور دماغی طور پر ہراساں کرنے کا کیس دائر کرنا پڑے گا۔
واضح رہے کہ مدھوبالا کی زندگی پر فلم ان کی بہن 80 سالہ مدھور برج بھوشن کے اشتراک سے پیش کی جائے گی جس کی تیاریاں جاری ہیں۔
مدھوبالا بھارتی فلم انڈسٹری کا وہ ستارہ تھیں جو اگرچہ کم وقت کے لیے چمکا لیکن جب تک اسکرین پر رہا اس نے سب کے دلوں پر راج کیا۔
مارلن منرو سے مشابہ مدھوبالا کا اصل نام ممتاز جہاں دہلوی تھا، انہوں نے 27سالہ فلمی کیرئیر میں 70 سے زائد فلموں میں کام کیا، ان کی فلم تاج محل باکس آفس پر بلاک بسٹر رہی تو مغل اعظم شاہکار قرار دی گئی۔
یاد رہے کہ مدھو بالا صرف 36 برس کی عمر میں23 فروری 1969 کو اس دنیا سے چل بسیں لیکن ان کی حسین مسکراہٹ آج بھی ان کےچاہنے والوں کے دلوں میں زندہ ہے ۔
