کراچی : معروف اداکارہ ماہرہ خان نے سماجی رابطوں کی ویب سائٹ سے عارضی طور پر کنارہ کشی اختیار کرنے کا اعلان کردیا اور مداحوں سے پیغام میں کہا کہ مجھے اپنی دعاؤں میں یاد رکھیں۔
تفصیلات کے مطابق سماجی رابطے کی ویب سائٹ ٹوئٹر پر اپنے پیغام میں اداکارہ ماہرہ خان کا کہنا تھا کہ کچھ وقت کے لئے سوشل میڈیا سے بریک لے رہی ہوں ، اپنی دعاؤں میں مجھے بھی یاد رکھیں جبکہ اداکارہ نے صبر و شکر کی بھی ہدایت کی۔
Taking a break from social media, for a little bit.
In times such as these ( and otherwise) just remember –
Sabr, Shukr and Tawakul ♥️— Mahira Khan (@TheMahiraKhan) April 29, 2020
چند روز قبل سماجی رابطے کی ویب سائٹ پر ریل گاڑی کی تصویر شیئر کرتے ہوئے ماہرہ خان نے لکھا تھا کہ ’ہمیشہ ایسا ہوتا ہے کہ جب میں ٹرین دیکھتی ہوں تو مجھے ایک بات کا احساس ہوتا ہے‘، مجھے ٹرین دیکھ ایسا محسوس ہوتا ہے کہ جیسے مجھے کوئی کہہ رہا ہو کہ جا ماہرہ جا، جی لے اپنی زندگی۔
خیال رہے کہ ماہرہ خان کا شمار صف اول کی اداکاراؤں میں ہوتا ہے، انہیں پاکستان اور بیرون ملک میں بھی بہت پسند کیا جاتا ہے، وہ اپنے مداحوں کے ساتھ رابطہ رکھنے کے لیے سوشل میڈیا پر بھی متحرک رہتی ہیں۔
حال ہی میں ہونے والے پاکستان اسکرین نیشنل ایوارڈز میں اداکارہ ماہرہ خان کو بہترین فلم اداکارہ کا ایوارڈ دیا گیا تھا۔