دیامیر: گلگت بلتستان کے ضلع دیامیر میں سیکیورٹی فورسز نے اہم کارروائی کرتے ہوئے اسکول جلانے والوں کے اہم کارندے کو ساتھی سمیت گرفتار کرلیا۔
تفصیلات کے مطابق دیامیر میں سیکیورٹی فورسز کی جانب سے کارروائی کی گئی جس کے باعث اہم گرفتاریاں عمل میں آئیں، مقابلے میں ایک اہلکار شہید اور تین زخمی بھی ہوئے۔
دیامر میں اسکول تباہ کرنے والوں کے خلاف سرچ آپریشن خفیہ اطلاعات پر کیا گیا، تانگیر میں چھپے دہشگردوں کے ٹھکانے پر جیسے ہی چھاپہ مارا گیا تو سکیورٹی فورسز کو دیکھتے ہی دہشت گردوں نے فائرنگ کردی۔
فائرنگ کے تبادلے میں پولیس اہلکار شہید جبکہ تین زخمی ہوگئے، کئی گھنٹے علاقہ گولیوں کی تڑتڑاہٹ سے گونجتا رہا، اسکول تباہ کرنے کے الزام میں گرفتار کیے گئے ملزمان کی تعداد سترہ ہوگئی۔
چلاس میں لڑکیوں کے 12 اسکول نذر آتش
دوسری جانب چیف جسٹس آف پاکستان نے دیامر میں اسکولوں کو جلانے کے واقعے کا از خود نوٹس لیتے ہوئے سیکریٹری داخلہ اور سیکریٹری گلگت بلتستان سے 48 گھنٹے میں رپورٹ طلب کرلی ہے۔
نگراں وزیراعظم ناصر الملک نے بھی کہا کہ بچوں کو تعلیم کی سہولت سے محروم کرنا اور اسکولوں کو نذرِ آتش کرنا کسی طور قبول نہیں، ملوث افراد کے خلاف قانون کے تحت سخت کارروائی کی جائے۔
یاد رہے کہ گذشتہ روز گلگت بلتستان کے ضلع دیامرکے علاقے چلاس میں جمعرات اور جمعہ کی درمیانی شب نامعلوم تعلیم دشمن شر پسندوں نے 12 اسکولوں میں توڑ پھوڑ کرتے ہوئے آگ لگا دی تھی۔
