کراچی : اعلیٰ تعلیم کا حصول ہر گزرتے دن کے ساتھ مہنگا ترین ہوتا چلا جارہا ہے اس کے علاوہ ملک میں بڑھتی ہوئی بیروزگاری بھی ایک بڑا مسئلہ خیال کیا جاتا ہے،ایسے میں کئی لوگ بذریعہ انٹرنیٹ یا شارٹ کورسز اور ہنر سیکھ کر پیسے کمانے کے ڈیجیٹل راستے تلاش کر رہے ہیں۔
اچھی ملازمت کیلئےاعلیٰ تعلیم کی ڈگری ہونا ضروری ہے لیکن پاکستان میں ایک بڑی تعداد میں لوگ اس کے اخراجات برداشت نہیں کرسکتے اور یہ ایسے لوگوں کے لیے زیادہ فائدہ مند ہوسکتی ہے جو ریسرچ کرنا چاہتے ہوں یا کچھ نیا کرنا چاہتے ہیں۔
آن لائن فری لانسنگ کام کرنے کیلئے کسی راکٹ سائنس کی ضرورت نہیں ہوتی یہ کام تھوڑی سی محنت سے بڑی کامیابی کے ساتھ کیا جاسکتا ہے جس کیلئے عمر، جنس یا تعلیم کی کوئی قید نہیں۔
ہمارے معاشرے میں اکثر لڑکیوں کو باہر کام کرنے کی اجازت نہیں ہوتی اس لیے وہ اس میں گھر بیٹھ کر پیسے کما سکتی ہیں۔ اس کے لیے ہنر کے ساتھ آپ کو گھر میں لیپ ٹاپ اور انٹرنیٹ چاہیے ہوتا ہے۔
بظاہر یہ آئیڈیا بہت بنیادی سا لگتا ہے لیکن یہ آئیڈیا دنیا میں بہت تیزی سے پھیل رہا ہے اور لوگ اس سے اچھی خاصی آمدنی بھی حاصل بھی کررہے ہیں اور اس کے رجحان میں دن بہ دن اضافہ ہورہا ہے۔
اس حوالے سے اے آر وائی نیوز کے پروگرام باخبر سویرا میں گفتگو کرتے ہوئے فری لانسر ذاکر حسین شاہ نے بتایا کہ فری لانسنگ میں مختلف شعبہ جات کے بہت سے کام کیے جاسکتے ہیں۔
انہوں نے بتایا کہ عوام کی سہولت کیلئے منسٹری آف انفارمیشن ٹیکنالوجی اینڈ ٹیلی کام کے تحت digiskills.pk ڈی جی اسکلز ڈاٹ پی کی سائٹ پر فری آن لائن کورسز کرائے جا رہے ہیں۔
