ریاض: سعودی عرب کے شہر مکہ مکرمہ میں ہوٹل میں آتشزدگی سے جاں بحق 8 پاکستانیوں میں سے 4 کی شناخت ہوگئی، تمام لاشوں کو سرد خانے منتقل کردیا گیا ہے۔
سعودی عرب میں مکہ کے ایک ہوٹل میں آتشزدگی کے ایک واقعے میں جاں بحق ہونے والے 8 پاکستانیوں میں سے 4 کی شناخت ہوگئی، واقعے میں متعدد افراد زخمی ہوئے ہیں۔
پاکستان قونصلیٹ جدہ میں قونصل ویلفیئر شیراز علی خان کا کہنا ہے کہ مکہ میں ابراہیم خلیل روڈ پر واقع ایک ہوٹل میں آتشزدگی کا یہ واقعہ پیش آیا۔
قونصل ویلفیئر کا کہنا ہے کہ ابتدائی اطلاعات میں بتایا گیا ہے کہ آگ ہوٹل کی تیسری منزل پر شارٹ سرکٹ سے ایک کمرے میں لگی جس نے دیگر کمروں کو بھی اپنی لپیٹ میں لے لیا۔ آگ لگنے سے چار کمروں کو نقصان پہنچا۔
مرنے والے پاکستانیوں میں 4 کی شناخت ہوگئی جن میں سے 2 کا تعلق وہاڑی جبکہ 2 کا قصور سے ہے، دیگر چار افراد کی شناخت کی کوشش کی جارہی ہے۔
شیراز علی خان کا کہنا ہے کہ جھلسنے کے باعث مرنے والوں کی لاشوں کی شناخت میں مشکل پیش آرہی ہے تاہم شناخت کا عمل جاری ہے۔
سعودی حکام کا کہنا ہے کہ ممکن ہے لاشوں کی شناخت کے لیے ڈی این اے سے مدد لی جائے۔
قونصل ویلفیئر کا مزید کہنا ہے کہ مرنے والوں کی لاشیں اسپتال کے سرد خانے میں رکھی گئی ہیں، ورثا سے رابطہ کیا جا رہا ہے جس کے بعد میتیں پاکستان بھجوانے یا مکہ میں تدفین کرنے کے حوالے سے فیصلہ کیا جائے گا۔
