سعودی عرب میں ماہر موسمیات ڈاکٹر عبد اللہ المسند کا کہنا ہے کہ مکہ مکرمہ اور مدینہ منورہ میں فجر، ظہر، عصر، مغرب اور عشا کی اذانیں بیک وقت دی جائیں گی۔
سعودی خبر رساں ادارے سبق ویب کی رپورٹ کے مطابق موسمیاتی تبدیلی کے باعث دونوں شہروں مکہ اور مدینہ میں تمام نمازوں کے أوقات ایک ہی ہوں گے۔
ڈاکٹر عبد اللہ المسند کے مطابق ’جمعہ کے بعد آئندہ کئی دنوں تک مغرب اور عشا کی اذانیں دونوں مقدس شہروں میں بیک وقت دی جائیں گی‘۔
انہوں نے کہا کہ موسم کی تبدیلی کے بعد دونوں مقدس شہروں میں اذان کے أوقات میں معمول کے مطابق تبدیلی کی جائے گی‘۔
واضح رہے کہ مکہ مکرمہ اور مدینہ منورہ میں عام طور 10 منٹ تک کے فرق سے اذان دی جاتی ہے۔
دوسری جانب مسجد الحرام میں فوٹوگرافی سے متعلق قواعد وضوابط جاری کیے گئے ہیں۔
سعودی وزارت حج وعمرہ نے مسجد الحرام میں فوٹو گرافی کرنے والے افراد کے لیے چار ضوابط کی وضاحت کی ہے جس کا مقصد زائرین اور نمازیوں کو مشکلات اور عبادات میں ممکنہ رکاوٹوں سے بچانا ہے۔
وزارت کی جانب سے ایک اکاؤنٹ پر اس حوالے سے جاری بیان میں فوٹو گرافی کرنے والے افراد کو پابند کیا گیا ہے کہ وہ زائرین کی آمدورفت کے راستوں سے دور فوٹو گرافی کریں اور اس دوران اس بات کا بھی خاص خیال رکھا جائے کہ کسی کی پرائیویسی متاثر کرنے والی تصاویر نہ لی جائیں۔
مسجد نبویؐ میں ایک ہفتے کے دوران 54 لاکھ زائرین کی آمد
وزارت نے مشورہ دیا کہ بغیر اجازت دوسروں کی تصویر لینے سے گریز کریں، فوٹو گرافی کا عمل جلد از جلد مکمل کریں اور اپنے روحانی سفر کے دوران ذکر اور عبادت میں زیادہ وقت صرف کریں۔
