اوٹاوا : نوبل انعام یافتہ ملالہ یوسف زئی نے کینیڈین وزیراعظم جسٹن ٹروڈو سے ملاقات کی، ملاقات میں دنیا بھر میں زیادہ سے زیادہ لڑکیوں کے اسکول جانے کے لئے کوششوں پر اتفاق کیاگیا۔
تفصیلات کے مطابق کینیڈا کے وزیراعظم نے سماجی رابطے کی ویب سائٹ ٹوئٹر پر نوبل انعام یافتہ ملالہ یوسف زئی کے ساتھ تصویر شیئر کرتے ہوئے ملاقات کو زبردست قرار دیا۔
اپنے ٹوئٹر پیغام میں جسٹن ٹروڈو نے کہا ملالہ سے ملاقات میں جی 7 جینڈر ایکولیٹی ایڈوائزری کونسل سے متعلق تبادلہ خیال کیا اور دنیا بھر میں زیادہ سے زیادہ لڑکیوں کے اسکول جانے کیلئے کوششوں پر اتفاق ہوا۔
Great to catch up with @Malala today in Ottawa. We talked about the important work of the G7 Gender Equality Advisory Council and our commitment to making sure more women & girls around the world get to go to school. pic.twitter.com/GU2GzdFNSc
— Justin Trudeau (@JustinTrudeau) September 7, 2018
ملالہ یوسف زئی نے بھی اپنے ٹوئٹر پیغام میں وزیراعظم جسٹن ٹروڈو کا ملاقات کیلئے وقت دینے اور لڑکیوں اور ہر بچے کی تعلیم کے لئے عزم کا شکریہ ادا کیا۔
So happy to be back in Canada today! 🇨🇦 Thank you, Prime Minister, for your time and your commitment to education for every child. https://t.co/xOELHsXMu8
— Malala (@Malala) September 8, 2018
واضح رہے 2012 میں مینگورہ میں ملالہ یوسف زئی پر اسکول سے گھر جاتے ہوئے طالبان نے حملہ کردیا تھا، جس میں وہ شدید زخمی ہوئی تھیں، ابتدائی طورپر ملالہ کو پاکستان میں ہی طبی امداد دی گئی تاہم بعد میں انہیں برطانیہ کے اسپتال میں منتقل کردیا گیا تھا۔
امن کا نوبیل انعام حاصل کرنے کے علاوہ متعدد ایوارڈ حاصل کرنے والی 20 سالہ ملالہ اس وقت برطانیہ کی آکسفورڈ یونیورسٹی میں زیرتعلیم ہیں۔
ملالہ یوسف زئی 3 سال تک دنیا کی بااثرترین شخصیات کی فہرست میں شامل رہیں جبکہ ان کو کینیڈا کی اعزازی شہریت بھی دی گئی۔