نوبیل انعام یافتہ پاکستانی طالبہ ملالہ یوسفزئی مشہور امریکی ڈراما سیریز فرینڈز میں جلوہ گر ہوں گی، فرینڈز کی کاسٹ ری یونین 27 مئی کو نشر کی جارہی ہے۔
بین الاقوامی ویب سائٹ کے مطابق مشہور امریکی ڈراما سیریز فرینڈز کی کاسٹ ری یونین کا انتظار مداحوں کو طویل عرصے سے تھا جو اب 27 مئی کو نشر ہوگی۔
اسٹریمنگ سروس ایچ بی او میکس کے مطابق فرینڈز ری یونین میں گلوکار جسٹن بیبر، لیڈی گاگا اور کے پاپ بی ٹی ایس بینڈ بھی شریک ہوں گے۔
ایچ بی او میکس کے مطابق فرینڈز کی پرانی کاسٹ کے اراکین ٹام سیلیک (رچرڈ) اور میگی ویلر (جینیس) کے ساتھ ساتھ ری یونین میں برطانوی کھلاڑی ڈیوڈ بیکھم، گیم آف تھرونز کے اداکار کٹ ہیرنگٹن اور پاکستان کی نوبیل انعام یافتہ ملالہ یوسف زئی سمیت 15 معروف شخصیات بطور مہمان شریک ہوں گی۔
فرینڈز دی ری یونین کی فلمبندی ایک برس قبل مکمل ہوجانی تھی لیکن عالمی وبا کرونا وائرس کی وجہ سے تاخیر کا شکار ہوگئی۔
کسی اسکرپٹ کے بغیر فرینڈز دی ری یونین کے ون آف اسپیشل کی فلم بندی رواں برس کے اوائل میں لاس اینجلس میں اسی انداز میں کی گئی جیسا کہ فرینڈز کی اوریجنل کامیڈی تھی۔
سیریز میں شامل جینیفر اینسٹن، کورٹنی کوکس، لیزا کوڈرو، ڈیوڈ شیویمر، میٹ لیبلانک اور میتھیو پیری اس ری یونین کا حصہ ہوں گے۔
سنہ 1990 کی دہائی کے مقبول ترین ٹی وی شوز میں سے ایک قرار دیے جانے والے فرینڈز کی 10 سالہ نشریات 2004 میں این بی سی ٹی وی پر اختتام پذیر ہوئی تھی۔ تاہم اسٹریمنگ پلیٹ فارمز نے اس مقبول ڈراما سیریز کو ایک نئی زندگی بخشی جہاں اس نے دنیا بھر میں سب سے زیادہ دیکھے جانے والے شو کا اعزاز پایا۔
گزشتہ روز ایچ بی او میکس کی جانب سے فرینڈز دی ری یونین کا آفیشل ٹیزر بھی ریلیز کیا گیا ہے۔
