مالدیپ نے بھارت کو الٹی میٹم دے دیا ہے کہ وہ ان کے ملک سے اپنی فوجیں 15 مارچ تک واپس بلا لے۔
غیر ملکی میڈیا کے مطابق مالدیپ کے صدر محمد معیزو نے بھارت کو الٹی میٹم دیا ہے کہ وہ 15 مارچ تک ان کے ملک سے اپنی فوجیں واپس بلا لے بصورت دیگر نتائج کی ذمے داری بھارت پر ہوگی۔
مالدیپ کے صدر معیزو نے کہا ہے کہ بھارتی فوج کو مزید مالدیپ میں رہنے کی اجازت نہیں دے سکتے۔
انڈر سیکریٹری برائے صدارتی امور عبدللہ خلیل کے مطابق مالدیپ میں 1988 سے بھارتی فوج کے یونٹس تعینات ہیں جو سرویلنس، ہوا بازی اور تربیت کی ذمے داریاں انجام دے رہے ہیں۔
واضح رہے مالدیپ کے نو منتخب صدر محمد معیزو نے یہ انتباہی بیان چین کے دورے میں صدر شی جن پینگ سے ملاقات اور چین سے واپسی کے چند روز بعد جاری کیا ہے۔
اس سے قبل گزشتہ ہفتے ڈاکٹر محمد معیزو کی کابینہ کے وزرا نے سوشل میڈیا پر مودی کو جوکر کہہ کر مخاطب کیا تھا جس پر مذکورہ تینوں وزرا کو معطل کر دیا گیا تھا تاہم اس واقعے کے بعد دونوں ممالک کے درمیان تناؤ میں اضافہ ہوگیا ہے۔
خیال رہے کہ مالدیپ میں نئے صدر محمد معیزو کی حکومت بننےکے بعد سے بھارت اور مالدیپ کے تعلقات کشیدہ ہیں۔
3 ماہ قبل مالدیپ کے صدر منتخب ہونے والے محمد معیزو نے الیکشن میں ‘انڈیا آؤٹ’ کا نعرہ لگایا تھا اور مالدیپ سے بھارتی فوج کی واپسی کا مطالبہ کیا تھا۔
