نیویارک: ڈاکٹر ملیحہ لودھی کا کہنا ہے کہ آزاد فلسطینی ریاست کے بغیر مشرق وسطیٰ میں دیرپا امن ممکن نہیں ہے، کشمیر اور فلسطین کے عوام دہائیوں سے انصاف کے منتظر ہیں۔
تفصیلات کے مطابق ڈاکٹر ملیحہ لودھی نے سلامتی کونسل میں مشرق وسطیٰ کی صورت حال پر خطاب کرتے ہوئے کہا کہ مشرق وسطیٰ میں تنازعات کشیدگی میں اضافے کا باعث بن رہے ہیں۔
انہوں نے کہا کہ آزاد فلسطینی ریاست کے بغیر مشرق وسطیٰ میں دیرپا امن ممکن نہیں ہے، کشمیر اور فلسطین کے عوام دہائیوں سے انصاف کے منتظر ہیں۔
ملیحہ لودھی نے کہا کہ پاکستان بات چیت سے مسائل کا حل ڈھونڈنے پر زور دیتا آیا ہے، پاکستان خطے میں امن کے لیے اپنا کردار ادا کرتا رہے گا۔
پاکستانی سفیر نے مزید کہا کہ وزیر اعظم عمران خان نے سعودی عرب اور ایران کے رہنماؤں سے ملاقاتیں کیں، وزیراعظم نے ملاقاتوں سےاتحاد بین المسلمین کی کوششوں کو فروغ دیا۔
ہر دن یوم سیاہ ہے جب تک کشمیریوں کو حق خودارادیت نہیں ملتا: ملیحہ لودھی
یاد رہے کہ دو روز قبل ڈاکٹر ملیحہ لودھی نے یوم سیاہ کشمیر کے موقع پر کہا تھا کہ ہر دن یوم سیاہ ہے جب تک کشمیریوں کو حق خودارادیت نہیں ملتا۔
اس موقع پر ملیحہ لودھی کا کہنا تھا کہ پاکستان کا نیو یارک میں مشن کشمیر کے عوام کا بھی مشن ہے۔
