نیویارک: اقوام متحدہ میں پاکستان کی مستقل مندوب ملیحہ لودھی کا کہنا ہے کہ عالمی امن وسلامتی کونئے خطرات درپیش ہیں۔امن کویقینی بنانا اقوام متحدہ کی ذمہ داری ہے۔
تفصیلات کے مطابق جنرل اسمبلی کے مباحثے میں اظہارخیال کرتے ہوئے ملیحہ لودھی کا کہنا تھا کہ غیر ملکی تسلط اور حق خودارادیت سے انکار نہیں کیا جاناچاہیے۔تنازعات عالمی عدالت انصاف لے جانے میں ہچکچاہٹ نہیں ہونی چاہیے۔
پاکستانی سفیر برائے اقوام متحدہ ملیحہ لودھی کا کہنا تھا کہ اقوام متحدہ کا مقصد عالمی سطح پر نا انصافیوں کو روکنا ہے۔ تنازعات کے حل میں اقوام متحدہ کی ناکامی دہرے معیار میں آتی ہے، فوجی جارحیت، بیرونی مداخلت کو نظر انداز کرنابھی دہرا معیار ہے.
ملیحہ لودھی کا کہنا تھا کہ بین الاقوامی سیاست میں گذشتہ دو دہائیوں کے مقابلے میں اب کافی غیر یقنی کی صورتحال ہے، بین الاقوامی امن وسلامتی کو نئے خطرات درپیش ہیں۔
اقوام متحدہ میں پاکستان کی مستقل مندوب ملیحہ لودھی کا کہنا تھا کہ مشرق وسطی اور افریقہ میں مسلسل افراتفری اور دہشتگردی پھیل رہی ہے، وسیع پیمانے پر انسانی حقوق کی خلاف ورزی کی جارہی ہے۔ ان کا کہنا تھا کہ دوسری جنگ عظیم کے بعد مہاجرین اور تارکین وطن کی بڑی تعداد ریکارڈ کی گئی جو بہت تشویشناک ہے۔
واضح رہے کہ ملیحہ لودھی اس سے قبل امریکا میں پاکستان کی سفیر اور برطانیہ میں ہائی کمشنر کی خدمات بھی انجام دے چکی ہیں۔
