کراچی: ملیر پولیس نے رشوت نہ دینے پر شہری کے خلاف ایک ماہ میں 5 مقدمات درج کر دیے، شہری محمد صدیق فریاد لے کر سندھ ہائی کورٹ پہنچ گئے۔
تفصیلات کے مطابق رشوت نہ دینے پر شہری کے خلاف ایک ماہ میں 5 مقدمات درج کرنے کے خلاف درخواست پر سماعت کرتے ہوئے سندھ ہائیکورٹ نے آئی جی سندھ، ڈی آئی جی ایسٹ و دیگر کو نوٹس جاری کرتے ہوئے جواب طلب کر لیا۔
سندھ ہائیکورٹ نے نیو علی محمد گوٹھ ملیر کے رہائشی شہری محمد صدیق کو تحفظ فراہم کرنے کا حکم بھی دیا، عدالت نے درخواست گزار کے خلاف درج مقدمات کا ریکارڈ بھی طلب کر لیا ہے، عدالت نے کہا بتایا جائے کہ کس بنیاد پر یہ مقدمات درج کیے گئے ہیں۔
ایڈووکیٹ لیاقت گبول نے درخواست گزار کی جانب سے عدالت کو بتایا کہ درخواست گزار کاروباری شخصیت ہے، آئے روز کسی نامعلوم ایف آئی آر میں نام ڈال کر گرفتاری ڈال دی جاتی ہے، پولیس صرف پیسوں کے لیے تنگ کر رہی ہے، آئی جی سندھ و دیگر حکام کو بھی پولیس کی زیادتیوں کے خلاف شکایت کی گئی تھی۔
