نئی دہلی: بھارت میں اپوزیشن پارٹی کانگریس کے صدر ملکارجن کھڑگے کا کہنا ہے کہ وزیر اعظم نریندر مودی کے دور حکومت میں ارب پتیوں کی مدد کی اور غریبوں کو دھوکا دیا۔
کانگریس کے صدر ملکارجن کھڑگے نے مودی حکومت کو ہدف تنقید بناتے ہوئے کہا کہ مودی نے اپنے 9 سالہ دور حکومت میں امیروں کی مدد کی ہے اور غریبوں کے ساتھ صرف دھوکا کیا ہے۔
انہوں نے تک بندی کرتے ہوئے مودی حکومت کی مدت کو متر کال قرار دیا اور کہا کہ اس دوران کیا کیا ہوا یہ یاد دلانا ضروری ہے۔
کھڑگے نے اپنے ٹویٹ میں کہا کہ یاد دلانا ضروری ہے کہ پچھلے 9 برسوں کے متر کال میں ارب پتیوں کو ملی ڈھیروں سوغات اور غریبوں سے کیا گیا صرف وشواس گھات، معاشی عدم مساوات کی خلیج کو کیا اتنا گہرا، عوام نے دیکھا اچھے دن کا اصلی چہرہ۔
کانگریس کی طرف سے پہلے بھی مودی حکومت کی 9 سال کی مدت کو ناکامیوں سے پر قرار دیا گیا ہے۔
ایک ٹویٹ میں راہول گاندھی نے کہا تھا کہ مہنگائی، نفرت اور بے روزگاری، وزیر اعظم جی، اپنی ان ناکامیوں کی لیجیئے ذمہ داری۔
اس ٹویٹ کے ساتھ انہوں نے 9 سال، 9 سوال کے عنوان سے پی ایم مودی کی 9 ناکامیوں کا تذکرہ بھی کیا ہے۔
ان 9 ناکامیوں کا تعلق معیشت، زراعت و کسان، بدعنوانی / مترواد، چین و قومی سیکورٹی، سماجی خیر سگالی، سماجی انصاف، جمہوری ادارے، مفاد عامہ کے منصوبے، کرونا مینجمنٹ سے ہے۔
