The news is by your side.

Advertisement

اقتصادی راہداری بھارت سمیت دیگر ممالک کو ہضم نہیں ہو رہی، ممنون حسین

کوئٹہ : صدر مملکت ممنون حسین نے کہا ہے کہ گوادر کاشغر اقتصادی راہداری عظیم الشان منصوبہ ہے ، جس کا سب سے زیادہ فائدہ بلوچستان کو ہوگا،منصوبے سے بہت سارے ممالک کے پیٹ میں درد شروع ہوگیا ہے۔

ان خیالات کااظہار انہوں نے گورنر ہاﺅس کوئٹہ میں صحافیوں اور ایڈیٹرز کے وفد سے بات چیت کرتے ہوئے کیا۔

صدر ممنون حسین نے کہا کہ اکنامک کوریڈور میں گوادر پورٹ، گوادرائیر پورٹ اور متعدد موٹر ویز کی تعمیر بھی شامل ہے۔

کوریڈور کا بنیادی مقصد ملک کے شہروں کو آپس میں اور مختلف ممالک کو پاکستان کے ساتھ ملانا ہے ، اقتصادی راہداری سے پاکستان اور چائنا کے علاوہ پوراسینٹرل ایشیاءبھی فائدہ اٹھائے گا۔

انہوں نے صحافیوں کے مختلف سوالات کے جواب میں کہا کہ چائنا پاکستان اقتصادی راہداری نہ صرف خطہ بلکہ بلوچستان کی محرومیوں کے خاتمہ کا باعث بھی بنے گی۔

ان کا کہنا تھا کہ بلوچستان کی محرمیوں کا ذمہ دار صرف مرکز ہی نہہیں بلکہ بلوچستان کے اپنے لوگ بھی ہیں۔ اقتصادی راہداری کے منصوبہ کے آغاز کے ساتھ ہی بہت سارے ممالک کے پیٹ میں درد شروع ہوگیا ہے اور وہ مختلف سازشوں میں لگ گئے ہیں۔

صدر ممنون حسین کا کہنا تھا کہ چین کی پاکستان میں سرمایہ کاری بھارت سمیت بہت سے ممالک کو ہضم نہیں ہو رہی۔

صدر مملکت نے بدعنوانی کے خاتمے پر زور دیتے ہوئے کہا کہ پاکستان کسی نعمت سے کم نہیں ہے مگر ہماری بدقسمتی ہے کہ حکمرانوں سمیت سب نے اس ملک کو نقصان پہنچایا ہے، سب کو مل کر کرپشن کے خاتمے کیلئے کردار ادا کرنا ہوگا۔

Print Friendly, PDF & Email

Comments

comments

یہ بھی پڑھیں