ڈیرہ اسماعیل خان: ظفر آباد کالونی میں پانچ سالہ بچی کوزیادتی کے بعد قتل کردیا گیا‘ پولیس نے ملزم کو گرفتار کرلیا‘ پہلے بھی زیادتی اور قتل کرچکا ہے۔
تفصیلات کے مطابق تھانہ ڈیرہ ٹاؤن کی حدود میں گلی سیداں والی ظفر آباد کالونی کی رہائشی پانچ سالہ بچی کی نعش گنے کے کھیت میں ملی ، جس کو زیادتی کے بعد قتل کردیا گیا تھا ۔
بچی کے والد غلام فرید کا کہنا ہے کہ گذشتہ رات ایک شادی کے دوران وہ اچانک غائب ہوگئی تھی ۔جس کی ٹاؤن پولیس کو اطلاع کی گئی۔ معصوم کی نعش صبح سویرے گنے کی فصل میں سے ملی جس کو زیادتی کے بعد قتل کرکے پھینک دیا گیا تھا ۔
پولیس نے تفتیش کے بعد مقتولہ کے قریبی رشتے دار 25سالہ بلال ولد عبدالرشید کو گرفتار کرلیا ۔ذرائع کے مطابق ملزم نے بچی سے زیادتی اور قتل کرنے کے حوالے سے اعتراف جرم کرلیا ہے ۔
ملزم نے نہ صرف مذکورہ واردات کا اعتراف کیا ہے بلکہ اسی علاقے میں 2014میں شمائلہ بی بی جو گھر سے سودا سلف لینے نکلی تھی اس کو بھی زیادتی کا نشانہ بنا کر قتل کرنے کا اعتراف کیا ہے ۔جبکہ برکی ٹائون میں سات سالہ ریحانہ بی بی کو اغواء کے بعد زیادتی کا نشانہ بنا کر قتل کرکے زمین میں دفنانے کے واقعے کا بھی اعتراف کرلیا ہے۔
ٹاؤن پولیس نے گرفتار ملزم کے خلاف بچی کے قتل سمیت دیگر وارداتوں کے سلسلے میں مقدمات درج کرلئے ہیں ۔واضح رہے کہ اس علاقے میں معصوم بچیوں سے زیادتی اور بعد میں ان کو قتل کرکے زمین میں دفنانے کی ہونے والی وارداتوں پر سخت تشویش پائی جاتی تھی۔
مذکورہ ملزم کی گرفتاری کے بعد کیس ٹریس ہونے پر اہلیان علاقہ نے گرفتار ملزم کو سخت سے سخت سزا دینے کا مطالبہ کیا ہے اور کیس ٹریس کرنے پر ڈی پی او یاسر آفریدی ،ایس پی انوسٹی گیشن حاجی ثناء اللہ اورشعبہ تفتیش ٹاؤن پولیس کو خراج تحسین پیش کیا ہے
