راولپنڈی: اسلام آباد ایئرپورٹ پر اے ایس ایف نے کارروائی کرتے ہوئے سعودی عرب جانے والے مسافر سے آئس ہیروئن برآمد کرلی۔
تفصیلات کے مطابق اسلام آباد ایئرپورٹ پرایئرپورٹ سیکیورٹی فورس نے سعودی عرب جانے والے مسافر کے قبضے سے آئس ہیروئن برآمد کرلی۔
اے ایس ایف کے مطابق مسافر سرفراز نے آئس ہیروئین سامان میں چھپا رکھی تھی، ملزم سوات کا رہائشی ہے جو جدہ جا رہا تھا۔ مسافر کو اے ایس ایف حکام نے اینٹی نارکوٹکس فورس کے حوالے کردیا۔
یاد رہے کہ 24 مارچ کو اسلام آباد ایئرپورٹ پر اے این ایف نے کارروائی کرتے ہوئے خاتون کو گرفتار کرکے کروڑوں روپے مالیت کی منشیات برآمد کی تھی۔
اے این ایف حکام کے مطابق برطانوی شہریت یافتہ خاتون کوثریونس سے 13کروڑ روپے مالیت کی منشیات برآمد ہوئی، خاتون نے 3 مختلف بیگزمیں 13 کلو ہیروئن چھپائی تھی۔
اسلام آباد ایئرپورٹ پر اے این ایف کی کارروائی‘ 2 ملزمان گرفتار
واضح رہے کہ 31 جنوری کو اسلام آباد ایئرپورٹ پر اے این ایف نے کارروائی کرتے ہوئے بیرون ملک منشیات سپلائی کرنے والے نیٹ ورک کے 2 افراد گرفتارکیے تھے۔
اے این ایف حکام کا کہنا تھا کہ ملزمان سے کروڑوں مالیت کی ایک کلو سے زائد منشیات برآمد ہوئی ہے، ملزمان قطرایئرلائن کی پروازکیو آر633 اے سے دوحا جا رہے تھے۔
