سوشل میڈیا پر وائرل ہونے والی ایک ویڈیو نے لوگوں کو خوفزدہ کردیا جس میں ایک شخص 14 فٹ طویل کنگ کوبرا پکڑنے کی کوشش کر رہا ہے۔
جنوبی تھائی لینڈ کے صوبے کربی میں ایک شخص نے ہاتھوں سے بڑے کنگ کوبرا کو پکڑلیا، مقامی افراد نے حکام کو اس وقت مطلع کیا جب سانپ کھجور کے باغ میں ٹینک میں چھپنے کی کوشش کر رہا تھا۔
دیوہیکل کوبرا تقریباً 14 فٹ لمبا ہے اور اس کا وزن 10 کلو گرام سے زیادہ تھا، سانپ کو پکڑنے میں رضا کار سوتی نواہاد کو تقریباً 20 منٹ لگے، نواہاد پہلے سانپ کو ایک کھلی سڑک پر لایا اور پھر اسے پکڑنے کی کوشش شروع کی۔
ویڈیو میں کنگ کوبرا کو پکڑے جانے کی تمام کوششوں کی مزاحمت کرتے ہوئے دکھایا گیا ہے، ایک موقع پر سانپ اپنا جبڑا کھول کر آگے بڑھ گیا لیکن نواہاد اپنے راستے سے ہٹنے میں کامیاب ہوگئے۔
مقامی افراد کا کہنا ہے کہ سانپ پکڑنے والے نے بتایا کہ کنگ کوبرا کو پکڑے جانے کے بعد اس کے قدرتی مسکن میں بحفاظت چھوڑ دیا گیا۔
انہوں نے کہا کہ سانپ شاید اپنے ساتھی کی تلاش میں تھا کیونکہ حال ہی میں ایک اور کوبرا کو مقامی لوگوں نے مار ڈالا تھا۔
نواہاد نے دوسروں کو بھی سانپوں کو پکڑنے کی کوشش کرنے سے خبردار کرتے ہوئے کہا کہ انہیں اس کی مہارت برسوں کی تربیت کے بعد آئی ہے۔
