سڈنی: آسٹریلوی شہر سڈنی کے ایک علاقے میں ایک راہ گیر کے ساتھ عجیب و غریب واقعہ پیش آیا، جس کی فوٹیج دیکھ کر لوگ حیران رہ گئے۔
تفصیلات کے مطابق سڈنی کے مضافاتی علاقے گلیب کی ایک سڑک پر عجیب و غریب واقعہ پیش آیا، ایک شخص نے دوسرے پر اچانک حملہ کر دیا اور دیکھنے والوں نے اس حملے کو بزدلانہ قرار دے دیا۔
اس واقعے کی سی سی ٹی وی فوٹیج سوشل میڈیا پر سامنے آنے کے بعد لوگ نوجوان کی حرکت پر حیران رہ گئے، ہوا یوں کہ ایک 60 سالہ شخص نے چلتے چلتے اچانک ایک نوجوان کی پسلی میں چٹکی کاٹی، اتنی سی بات پر نوجوان نے معمر شخص کی زندگی خطرے میں ڈال دی۔
معمر شخص آگے بڑھا تو نوجوان پلٹ کر آیا اور پیچھے سے اس کے سر پر زور دار مکا دے مارا، جس سے وہ وہیں پر گر کر بے ہوش ہو گیا، مکے سے اس کے سر کی ہڈی میں فریکچر آیا، پولیس کا کہنا تھا کہ متاثرہ شخص کو برین ڈیمیج کا بھی خطرہ لاحق ہے۔
لوگوں نے جب اس ویڈیو کو دیکھا تو پہلے تو وہ حیران ہوئے اور پھر رد عمل میں نوجوان کے مکے کو ’بزدل مکا‘ قرار دے دیا، جب کہ ایک تعداد حملے کو بزدل حملہ کہا۔ پولیس نے بھی اس حملے کو مکروہ، بلا اشتعال، اور سنگ دلانہ حملہ کہا.
پولیس اس نوجوان کو سرگرمی سے تلاش کر رہی ہے اور اس سلسلے میں عوام سے بھی مدد طلب کی گئی ہے، سی سی ٹی وی فوٹیج میں اسے واضح دیکھا جا سکتا ہے۔ پولیس کا کہنا ہے کہ نوجوان کی عمر اندازاً 20 سال ہے۔
