نئی دہلی: بھارت میں باپ کمسن بیٹے کی میت کو موٹر سائیکل پر لے جانے پر مجبور ہوگیا واقعے کی ویڈیو وائرل ہونے پر انتظامیہ نے ایکشن لے لیا۔
بھارتی میڈیا رپورٹس کے مطابق افسوسناک واقعہ ریاست آندھرا پردیش کے سرکاری اسپتال میں پیش آیا، نجی ایمبولینس کے ڈرائیور نے مبینہ طور پر نرسمہلو نامی شخص سے 10 سالہ بیٹے کی میت لے جانے کے لیے 20 ہزار روپے کا مطالبہ کیا۔
باپ نے ایمبولینس ڈرائیور سے رقم کم کرنے کی التجا کی لیکن ڈرائیور نے ان کی ایک نہ سنی اور مجبور باپ سے بدتمیزی کرنے لگے۔
بیٹے کی میت لے جانے کے لیے کوئی راستہ نہ بچا تو انہوں نے لاش کو اپنی موٹر سائیکل پر 90 کلو میٹر دور گھر لے جانے کا فیصلہ کیا۔
سابق وزیر اعلیٰ این چندرا بابو نائیڈو نے واقعے کی ویڈیو شیئر کی جس پر سوشل میڈیا صارفین کی جانب سے غم و غصے کا اظہار کیا جارہا ہے۔
My heart aches for innocent little Jesava,who died at Tirupati’s RUIA hospital.His father pleaded with authorities to arrange an ambulance which never came.With mortuary vans lying in utter neglect,pvt ambulance providers asked a fortune to take the child home for final rites.1/2 pic.twitter.com/mcW94zrQUt
— N Chandrababu Naidu (@ncbn) April 26, 2022
رپورٹ کے مطابق 10 سالہ بچہ جگر کے عارضے میں مبتلا تھا جسے علاج کے لیے اسپتال میں داخل کرایا گیا تھا اور گزشتہ روز اس کی موت ہوگئی تھی۔
سوشل میڈیا پر ویڈیو وائرل ہونے کے بعد ضلعی انتظامیہ حرکت میں آگئی اور واقعے کی تحقیقات کا حکم دے دیا۔
