برطانیہ میں برگر کو الگ کرنے کے دوران شہری پیٹ میں چھری لگنے سے ہلاک ہوگیا۔
غیرملکی خبررساں ادارے کی رپورٹ کے مطابق افسوسناک واقعہ برطانیہ کے شہر ویلز میں پیش آیا جہاں بیری گریفتھس نامی شخص فروزن برگر کو چھری سے الگ کرنے کے دوران حادثاتی طور پر چل بسا۔
پولیس کا بتانا ہے کہ بیری کا ایک ہاتھ فالج کی وجہ سے متاثر تھا اور وہ دوسرے ہاتھ سے چھری سے برگر الگ کر رہا تھا۔
تفتیشی حکام کا کہنا ہے کہ بیری کے کچن میں ایک چاقو اور دو منجمد برگر ملے ہیں۔
رپورٹ کے مطابق برگرز الگ کرنے کی کوشش کے دوران چھری اس کے پیٹ میں لگی جس کے نتیجے میں وہ زخمی ہوگیا اور خون زیادہ بہہ جانے کی وجہ سے اس کی موت ہوئی۔
انسپکٹر جوناتھن ریس کے مطابق پہلے ان کا خیال تھا کہ چاقو کی نوک پر چاکلیٹ لگی ہے لیکن بعد میں علم ہوا کہ یہ بیری کے خون کے نشان تھے۔
انہوں نے بتایا کہ انہیں فلیٹ میں کسی کے داخلے یا باہر نکلنے کے کوئی آثار نہیں ملے اور نہ ہی بیری نے خود کو نقصان پہنچانے کی کوئی کوشش کی تھی۔
رپورٹ کے مطابق یہ واقعہ گزشتہ برس پیش آیا تھا اور بیری کی لاش پولیس نے جولائی میں گھر سے برآمد کی تھی۔
