امریکا میں ایک شخص کو گاڑی میں مگر مچھ لے کر گھومنے پر گرفتار کرلیا گیا، مگر مچھ کا منہ سیاہ ٹیپ سے باندھا گیا تھا۔
امریکی میڈیا کے مطابق واقعہ امریکی ریاست کیلی فورنیا میں پیش آیا، پولیس کو ایک گاڑی کے بارے میں اطلاع ملی کہ اس کا ڈرائیور ممکنہ طور پر نشے میں ہے۔
پولیس نے گاڑی کو روک کر اس کی تلاشی لی تو ان کی حیرت کی انتہا نہ رہی جب انہوں نے اس کے اندر مگر مچھ کا ایک بچہ دیکھا۔
مگر مچھ پچھلی مسافر سیٹ کے فرش پر تھا اور اس کا منہ سیاہ ٹیپ سے باندھا گیا تھا۔
گاڑی کے ڈرائیور 29 سالہ ٹیلر واٹسن نے کہا کہ یہ مگر مچھ اس کے دوست کا تھا جو پچھلے ہفتے سے پولیس کی حراست میں ہے۔
پولیس نے کیلی فورنیا ڈپارٹمنٹ آف فش اینڈ وائلڈ لائف کو طلب کیا جنہوں نے آ کر مگر مچھ کے بچے کو احتیاط سے اپنی تحویل میں لے لیا۔
29 سالہ ڈرائیور کو بھی پولیس نے اپنی حراست میں لے لیا، وہ پہلے ہی ایک معمولی نوعیت کے جرم کے بعد اپنے پروبیشن پر تھا اور اب اس پر مزید الزامات عائد کردیے گئے ہیں۔
