The news is by your side.

Advertisement

معمر شخص نے کرونا ویکسین کی 87 ڈوز لگوالیں، وجہ سامنے آ گئی

برلن: جرمنی میں ایک معمر شخص نے کرونا ویکسین کی 87 ڈوز لگوا لیں، جس پر انھیں گرفتار کر کے تفتیش شروع کر دی گئی ہے۔

تفصیلات کے مطابق جرمنی میں ایک 61 سالہ شخص نے مبینہ طور پر کووِڈ 19 ویکسین کی 87 ڈوز لگوا لیں، جمعہ کو مقامی اخبار نے رپورٹ میں کہا کہ مذکورہ شخص کو گرفتار کر کے تفتیش کی جا رہی ہے۔

یہ رپورٹ ایک ایسے وقت میں سامنے آئی ہے جب جرمنی کرونا انفیکشن کی نئی لہر کا سامنا کرتے ہوئے دیگر مغربی یورپی ممالک کے مقابلے میں اپنی ویکسینیشن کی شرح بڑھانے کے لیے جدوجہد کر رہا ہے۔

رپورٹ کے مطابق معمر شخص نے مشرقی صوبوں سیکسنی اور سیکسنی انہالٹ میں بار بار کئی ویکسینیشن مراکز پر جا کر کرونا ویکسین لگوائی۔

یہ بھی کہا گیا ہے کہ کہ مذکورہ شخص نے چند مرتبہ تو ایک دن میں تین تین ٹیکے بھی لگوائے تھے، تاہم آخر کار شہر ڈریسڈن کے ایک ویکسینیشن مرکز کے ایک کارکن نے انھیں پہچان لیا کہ وہ پہلے بھی حفاظتی ٹیکے لگوا چکا تھا۔

اگلی بار جب وہ لیپزگ کے باہر، ایلنبرگ قصبے میں ایک ویکسینیشن سینٹر میں داخل ہوا تو عملے نے پولیس کو بلا لیا اور انھیں حراست میں لے لیا گیا۔

پولیس کا کہنا تھا کہ اس شخص نے ایسا اپنے ویکسینیشن سرٹیفیکیٹ ان افراد کو فروخت کرنے کے لیے کیا، جو ویکسین نہیں لگوانا چاہتے تھے۔

رپورٹ کے مطابق، جب بھی وہ شخص ویکسینیشن مرکز میں داخل ہوتا تھا، تو اپنے ساتھ ویکسینیشن کی ایک نئی، خالی دستاویز لاتا تھا، ویکسین لگنے کے بعد وہ ویکسین کے بیچ نمبروں کے بارے میں معلومات والے صفحات کو نکال لیتا تھا اور انھیں ویکسین نہ لگوانے والوں کو فروخت کرتا تھا۔

Comments

یہ بھی پڑھیں