بھارت کی ریاست کرناٹک میں نا خلف بیٹے نے والدین کو قتل کروانے کیلیے اجرتی قاتلوں کی خدمات حاصل کیں جو اسے مہنگی پڑ گئی۔
جائیداد کے تنازع پر 31 سالہ ونائک نے والد پرکاش اور سوتیلی والدہ سنندا کو موت کے گھاٹ اتارنے کیلیے اجرتی قاتلوں کو رقم ادا کی تھی، لیکن غلط پہچان کی وجہ سے قاتلوں نے گھر کے دیگر چار افراد کو بھی قتل کیا۔
19 اپریل کی علی الصبح ملزمان نے ونائک کے چچا سمیت چار مہمانوں کو ہلاک کیا۔ واردات کے دوران نا خلف بیٹے کے والدین نے خود کو ایک کمرے میں بند کر لیا تھا جس کی وجہ سے ان کی جان بچ گئی۔
پولیس کے مطابق ونائک نے اجرتی قاتلوں کو 65 لاکھ روپے دینے کا وعدہ کیا تھا جبکہ 2 لاکھ روپے ایڈوانس دیے تھے۔
ونائک اور پرکاش کے درمیان جائیداد کا تنازع ہے۔ بیٹے نے چند ماہ قبل والد کی اجازت کے بغیر جائیداد کا کچھ حصہ فروخت کر دیا تھا جس کی وجہ سے تنازع شدت اختیار کر گیا۔
پولیس نے گھر میں لگے سی سی ٹی وی کی فوٹیجز کی مدد سے 72 گھنٹے کے اندر ملزمان کو گرفتار کیا جن کے خلاف مقدمہ درج کر کے تحقیقات کا شروع کر دی گئیں۔
