site
stats
حیرت انگیز

خودکشی سے بچانے والا پنکھا تیار

زندگی سے بیزار افراد خودکشی کے لیے پنکھے سے لٹکنے کا طریقہ استعمال کرتے ہیں جو نہایت پرانا اور آزمودہ ہے، تاہم حال ہی میں ایک شخص نے ایسا پنکھا ایجاد کیا ہے جو خودکشی کرنے والے شخص کی کوشش کو ناکام بنا کر اسے ایک بار پھر زندگی کے بارے میں سوچنے پر مجبور کردے گا۔

یہ پنکھا شرد آشانی نامی بھارتی شخص نے تیار کیا ہے۔ اس کے بنائے ہوئے پنکھے میں چھت سے لٹکنے والی راڈ لچکدار ہے جس میں مختلف اسپرنگز کا مکینزم نصب کیا گیا ہے۔

جیسے ہی اس راڈ پر دباؤ پڑے گا اس کے اندر موجود اسپرنگ اسے نیچے کردیں گے اور یوں خودکشی کرنے والا شخص زمین پر واپس آگرے گا۔

شرد کو اس ایجاد کا خیال اپنی پسندیدہ ماڈل نفیسہ جوزف کی خودکشی کے بعد آیا۔ سنہ 2004 میں بھارت کی مشہور ماڈل اور سابق ملک حسن نفیسہ نے اپنے شوہر کی بے وفائی کے بعد پنکھے سے لٹک کر خودکشی کی تھی۔

شرد کا کہنا ہے کہ ان کی یہ ایجاد ان لاتعداد بھارتیوں کی جان بچانے میں معاون ثابت ہوگی جو اپنے مسائل کو حل نہیں کر سکتے اور انہیں آسان راستہ موت کا نظر آتا ہے۔

یاد رہے کہ بھارت میں خودکشی کے رجحان میں خطرناک حد تک اضافہ ہوچکا ہے۔

مزید پڑھیں: بھارتی شہری خودکشیوں میں سرفہرست

بھارتی ادارہ شماریات کے مطابق بھارت میں ہر سال 1 لاکھ 30 ہزار افراد خودکشی کی کوشش کرتے ہیں۔ ان میں سے 60 ہزار سے زائد افراد پنکھے سے لٹکنے کا طریقہ استعمال کرتے ہیں۔

اس سے قبل عالمی ادارہ صحت ڈبلیو ایچ او نے بھی اس حوالے سے ایک رپورٹ جاری کی تھی جس میں بتایا گیا تھا کہ دنیا بھر میں ذہنی تناؤ کے باعث سب سے زیادہ خودکشیاں بھارت میں ہوتی ہیں۔

شرد کو امید ہے کہ اس کے تیار کیے ہوئے پنکھے کو سرکاری سرپرستی دی جائے گی اور اسے زیادہ سے زیادہ مارکیٹ میں پھیلایا جائے گا تاکہ خودکشی پر آمادہ بے شمار بھارتیوں کی جان بچائی جا سکے۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top