ٹی وی یا فلموں میں کام کرنے کا خواب دیکھنے والے ایک شخص نے ٹک ٹاک کا سہارا لے کر اپنی خوابوں کی تعبیر مکمل کرلی۔
جوش نیلے کا تعلق امریکا سے ہے، انکی عمر 42 سال ہے وہ ٹک ٹاک ویڈیوز میں مختلف مقامات پر مردہ بنے نظر آتے تھے اور اس طرح وہ ٹی وی اداکار بننے میں کامیاب ہوگئے۔
جوش نیلے کا ٹک ٹاک اکاؤنٹ ایسی کئی ویڈیوز سے بھرا ہوا ہے جس میں وہ لاش بنے نظر آتے ہیں اور اب وہ امریکا کے معروف ٹی وی شو سی ایس آئی ویگاس میں لاش کا کردار ادا کررہے ہیں۔
ان کا ٹک ٹاک اکاؤنٹ لیونگ ڈیڈ جوش کے نام سے ہے جہاں وہ اکثر اپنی ویڈیوز پوسٹ کرتے ہیں جس میں وہ بے جان پڑے ہوتے ہیں۔
ان کے اکاؤنٹ کو ایک لاکھ سے زیادہ افراد فالو کررہے ہیں جبکہ ویڈیوز کو 40 لاکھ سے زیادہ لائیکس مل چکے ہیں۔
انہوں نے ایک انٹرویو میں بتایا کہ ایک ٹک ٹاک پوسٹ دیکھ کر مجھے یہ خیال آیا، میں نے سوچا کہ اگر میں مردہ شخص کا کردار اچھے انداز سے ادا کروں تو کسی ٹی وی شو یا فلم پروڈکشن کمپنی کی توجہ حاصل کرسکتا ہوں، اور یہ طریقہ واقعی کام کرگیا ۔
انہیں اس مقصد کے حصول میں 321 دن لگے مگر ویڈیوز نے آخرکار سی بی ایس ٹی وی نیٹ ورک کی توجہ حاصل کرلی۔
