کراچی کے علاقے گلشن اقبال میں نجی مال کی تیسری منزل سے نوجوان نے چھلانگ لگادی۔
اے آر وائی نیوز کے مطابق کراچی کے علاقے گلشن اقبال میں نجی مال کی تیسری منزل سے نوجوان کود گیا، 29 سال کا زخمی نوجوان زبیر نجی اسپتال میں دم توڑ گیا۔
پولیس حکام کا کہنا ہے کہ گھر والوں کا بیان ریکارڈ کرنے کے بعد وجوہات کا پتا چل سکے گا، نوجوان کی لاش کو ضابطے کی کارروائی کے بعد ورثا کے حوالے کردیا جائے گا۔
پولیس کا کہنا ہے کہ سی سی ٹی وی فوٹیج کے مطابق نوجوان نے خودکشی کی ہے، واقعے کی مزید تحقیقات جاری ہیں۔
واضح رہے کہ لڑکے سے متعلق دو ویڈیوز سامنے آئی ہیں جس میں دیکھا جاسکتا ہے کہ نوجوان تیسری منزل سے چھلانگ لگا رہا ہے جبکہ دوسری ویڈیو اسے نیچے گرا دیکھا جاسکتا ہے۔
متوفی کے دوست کے مطابق زبیر بیروزگاری کی وجہ سے معاشی حالات کافی خراب تھے جس کی وجہ سے اس نے موت کو گلے لگالیا۔
پولیس کا بتانا ہے کہ متوفی غیرشادی شدہ تھا اور والدہ اسکول میں ٹیچر تھیں جو گھر کا خرچ برداشت کرتی تھیں، یہ تین بھائی اور ایک بہن تھی جبکہ پڑوسی کا کہنا ہے کہ گھر والے تنگ دستی کا شکار تھے۔
پولیس کے مطابق اہلخانہ نے قانونی کارروائی سے انکار کردیا ہے۔
