بھارت میں ممبئی ایئرپورٹ کو اُڑانے کی دھمکی دینے کے الزام میں کیرالہ کے ایک رہائشی کو انسداد دہشت گردی اسکواڈ نے حراست میں لے لیا۔
بین الاقوامی خبر رساں ادارے کی رپورٹ کے مطابق ملزم نے مبینہ طور پر دھمکی دی تھی کہ اگر اُسے بِٹ کوائن کرنسی کی شکل میں 10 لاکھ ڈالر نہیں دیے گئے تو وہ ایئرپورٹ کو دھماکے سے اُڑا دے گا۔ جس کے بعد ایئر پورٹ کی سیکورٹی میں اضافہ کردیا گیا تھا۔
اینٹی ٹیررازم سکواڈ کے ایک افسر نے اس حوالے سے بتایا کہ یہ دھمکی جمعرات کو ایئرپورٹ حکام کو صبح تقریباً 11 بجے ایک ای میل کے ذریعے موصول ہوئی تھی۔
ملزم نے دھمکی دیتے ہوئے کہا تھا کہ ’یہ آپ کے ایئرپورٹ کے لیے آخری وارننگ جاری کی جارہی ہے، اگر ہمیں بتائے گئے پتے پر 10 لاکھ ڈالرز بِٹ کوائن کرنسی کی شکل میں ادا نہیں کیے گئے تو ہم اگلے 48 گھنٹوں میں ایئرپورٹ کا ٹرمنل 2 اُڑا دیں گے۔‘
ایئرپورٹ کی انتظامیہ نے دھمکی موصول ہونے کے بعد اس کا مقدمہ سحر پولیس سٹیشن میں درج کروایا تھا۔جس کے بعد پولیس کی جانب سے تحقیقات کا آغاز کردیا گیا تھا۔
اینٹی ٹیررازم سکواڈ کے سائبر سیل نے اس معاملے کی تحقیقات شروع کیں اور انہیں معلوم ہوا کہ دھمکی آمیز ای میل کیرالہ کے ایک مقام سے ارسال کی گئی ہے۔
بھارت کی معروف یوٹیوبر کی گھر سے لاش بر آمد
بھارتی میڈیا کا اس حوالے سے کہنا ہے کہ کیرالہ میں ملزم کو مہاراشٹر کے افسران نے گرفتار کیا اور اُسے ممبئی منتقل کیا جا رہا ہے، واضح رہے کہ اینٹی ٹیررازم سکواڈ کی جانب سے تاحال ملزم کی شناخت ظاہر نہیں کی گئی ہے۔
