کراچی: شہر قائد کے علاقے منگھوپیر میں گھر سے 12 سالہ بچی کی پھندا لگی لاش ملی ہے، جس کے بارے میں پولیس کا کہنا ہے کہ واقعہ کھیل کے دوران دوپٹے کے پھندا بن جانے کے باعث پیش آیا ہوا لگتا ہے۔
اے آر وائی نیوز کے مطابق پولیس نے کہا ہے کہ کراچی کے علاقے منگھوپیر میں ایک گھر سے بارہ سالہ بچی کی پھندا لگی لاش ملی، بچی کی شناخت ثمینہ کے نام سے ہوئی ہے۔
پولیس نے بتایا کہ بچی کے والدین گھر سے باہر گئے ہوئے تھے، واقعے سے قبل بچی ٹیوشن سےگھر آئی تھی، چھوٹا بھائی بھی گھر پر موجود تھا، ابتدائی تفتیش سے معلوم ہوتا ہے کہ واقعہ اتفاقیہ طور پر ہلاکت کا ہے۔
پولیس بیان کے مطابق ثمینہ کمرے کے دروازے کی چوکھٹ میں دوپٹہ باندھ کر کھیل رہی تھی، دوپٹے کا پھندا بنا کر گلے میں ڈال کرگھومی تو پھندے نے بچی کےگلے کو جکڑ لیا۔
واقعے کے وقت گھر میں موجود چھوٹے بھائی نے پڑوس میں اپنی ممانی کو اطلاع دی، تاہم بچی کی ممانی گھر میں داخل ہوئی تو بچی کی سانسیں رک چکی تھیں۔
پولیس کا کہنا ہے کہ واقعے کی مزید تفتیش کے لیے لاش کا پوسٹ مارٹم کرایا جا رہا ہے۔
