معروف پاکستانی اداکار و میزبان مانی (سلمان شیخ) اپنی اہلیہ اداکارہ حرامانی کی حمایت میں سامنے آگئے۔
مانی نے سماجی رابطے کی ویب سائٹ انسٹاگرام پر ایک سے زائد اسٹوریز اپ لوڈ کی ہیں جن میں انہوں نے کہا کہ انہیں حرا پر فخر ہے جس نے لندن میں 10 ہزار حاضرین کے سامنے پرفارم کیا، اللہ جسے چاہے عزت دے۔
انہوں نے انسٹا اسٹوری میں ویڈیو شیئر کی جس میں سوشل میڈیا پر ٹرولنگ کرنے والوں کو مخاطب کرتے ہوئے انہوں نے لکھا کہ ہوشیاروں کیسے ہو؟ ہم اس وقت لندن میں بیٹھے ہوئے ہیں، جو کرنا ہے کرلو، تم لوگ کچھ نہیں کرسکتے اس لیے خوش رہو، ہمیں پھر بھی آپ سب سے محبت ہے جو کرنا ہے کرتے رہو۔
ایک اور انسٹا اسٹوری میں انہوں نے لکھا کہ ساری توجہ ہم ہی لے گئے، بھائی، اس رات باقی لوگ بھی آئے تھے۔ ہمیں تنقید کرنے والوں سے پیار ہے جن کی وجہ سے ہم مزید محنت کرتے ہیں۔
خیال رہے کہ حرا مانی نے چند روز قبل ایک کانسرٹ میں پرفارم کیا تھا جس کی ویڈیوز وائرل ہوئی تھیں، حرا شرکا کو اپنے ساتھ گانے کے لیے اکساتی رہیں لیکن شرکا بیزار اور اکتائے ہوئے بیٹھے رہے، حرا کی ویڈیوز وائرل ہونے کے بعد انہیں مذاق کا نشانہ بنایا جارہا تھا۔
