چیئرمین پاکستان پیپلزپارٹی بلاول بھٹو زرداری نے کہا ہے کہ میرے منشور کا حصہ ہے کہ عدلیہ کو اتنا مضبوط بنادیں کہ عوام کوفوری انصاف ملے۔
بلاول کا کہنا تھا کہ عدلیہ کا ہم سے زیادہ عزت و احترام کوئی نہیں کرے گا، بدقسمتی سے آج کی عدلیہ سیاسی مسائل میں پھنس جاتی ہے اور عوام کو انصاف نہیں ملتا، اپنے وکلا کو سمجھانا ہے کہ ایک مرتبہ پھر پیپلزپارٹی کے کالے کوٹ میں نکلنا ہے۔
ہماری جنگ ایسی نہیں ہونی چاہیے کہ جمہوری آئینی جدوجہد کو نقصان ہو، جانتا ہوں وکلا کو اپنے مقاصد کیلئے استعمال کیا جائےگا کہیں نہ کہیں ہینڈ شیک بھی ہوگا، چاہتا ہوں وکلا اپنا مائنڈ استعمال کریں اور میں بھی انھیں سمجھا سکوں۔
چیئرمین پی پی نے کہا کہ وکلا کی محنت سے ہی ہم آگے بڑھنے میں کامیاب ہوئے، پاکستان کے عوام کو سیاست سے نقصان پہنچا ہے، کچھ لوگ سمجھتے ہیں ٹی وی پر آکر ہیرو بنیں گے ایک دو جلسے جلوس نکالیں گے۔
انھوں نے کہا کہ کچھ لوگ سمجھتے ہیں چیف جسٹس تیرے جانثار کے نعرے لگائیں گے، یہ وہی لوگ ہیں جنھوں نے 19 ویں ترمیم پاس کرائی اب انکارکررہے ہیں، ہم چاہتے ہیں وکلا مضبوط ہوجائیں اوران کی بھی ایک آواز ہو۔
بلاول بھٹو کا کہنا تھا کہ ہم چاہتے ہیں وکلا بھی ججزکی تقرری میں اپنی آواز شامل کریں، ایسا نہیں ہونا چاہیے کہ ایک شخص بیٹھ کر کون جج ہوگا اس کا فیصلہ کرے، چاہتے ہیں کہ ججز کی تقرری کےعمل میں وکلا بھی شامل ہوں۔
