اسلام آباد: لینڈ مافیا کے کارندے منشا بم کی ایک روزہ راہداری ریمانڈ منظور کرلیا گیا۔ منشا بم اور اس کے بچوں پر زمینوں پر قبضے کے 70 سے زائد کیسز رجسٹرڈ ہیں۔
تفصیلات کے مطابق منشا بم کو آج اسلام آباد کی انسداد دہشت گردی عدالت پہنچایا گیا، منشا بم نے کہا کہ میرے وکیل کا انتظار کیا جائے۔
منشا بم نے عدالت میں کہا کہ پنجاب پولیس پر اعتماد نہیں، قتل کر دیا جائے گا۔
عدالت نے منشا بم کو ایک روزہ راہداری ریمانڈ پر لاہور پولیس کے حوالے کر دیا۔ ملزم کو کل متعلقہ عدالت میں پیش کیا جائے گا۔
خیال رہے کہ یکم اکتوبر کو چیف جسٹس میاں ثاقب نثار کی سربراہی میں سپریم کورٹ کے دو رکنی بینچ نے لاہور میں سرگرم قبضہ مافیا گروپ کے سرغنہ منشا بم سے متعلق کیس کی سماعت کی تھی۔
چیف جسٹس نے ریمارکس دیے کہ پاکستان میں تارکین وطن کی جائیداد پر قبضہ ہوجاتا ہے، منشا بم نے بھی اوور سیز پاکستانی کی جائیداد پر قبضہ کیا ہے۔
عدالت عظمیٰ نے قبضہ مافیا کے سرغنہ منشا بم کی گرفتاری اور اس کے قبضے میں تمام اراضی واگزار کرنے کا حکم دیا تھا۔ منشا بم اور اس کے بچوں پر زمینوں پر قبضے کے 70 سے زائد کیسز رجسٹرڈ ہیں۔
گزشتہ روز منشا بم ضمانت کے حصول کے لیے سپریم کورٹ پہنچا تاہم اسے گرفتار کرلیا گیا۔
گرفتاری سے قبل ملزم نے گفتگو کرتے ہوئے کہا کہ شفیق گجر کے بھائی سے لین دین کے تنازعہ پر جھگڑا ہوا، ایس ایس پی شفیق گجر نے میرے خلاف مقدمہ درج کیا اور میرا نام بم رکھا۔
