مردان: خیبر پختون خوا کے شہر مردان کےعلاقے رشید آباد میں مکان کی فروخت کے تنازعے پر 4 افراد کا قتل ہو گیا۔
تفصیلات کے مطابق مردان کے علاقے رشید آباد میں ایک پڑوسی نے سستا مکان نہ بیچنے پر خاتون کو ان کے تین بیٹوں سمیت قتل کر دیا، جاں بحق افراد میں زوجہ رحیم گل اور اس کے 3 بیٹے عثمان، نعمان اور عرفان شامل ہیں۔
اہل محلہ کے مطابق قاتل اور مقتولین پڑوسی ہی، گھر کا سربراہ رحیم گل کراچی میں ملازمت کرتا ہے، رحیم اپنا مکان فروخت کرنا چاہتا تھا، پڑوسی نے کم قیمت پر خریدنا چاہا تو رحیم نے فروخت سے انکار کر دیا۔
اس بات پر دونوں کے درمیان رنجش ہو گئی، ملزمان نے رحیم کے گھر میں گھس کر فائرنگ کر کے ماں اور تینوں بیٹوں کو قتل کر دیا، گھر کا سربراہ رحیم گل کراچی میں ہونے کی وجہ سے محفوظ رہا۔
ریسکیو ون ون ٹو نے لاشوں کو اسپتال منتقل کر دیا ہے، جہاں پوسٹ مارٹم جاری ہے، پولیس کے مطابق ملزمان کی گرفتاری کے لیے چھاپے مارے جا رہے ہیں، اور انھیں جلد گرفتار کر لیا جائے گا۔
ماں اور 3 بیٹوں کے قتل کا مقدمہ خاتون کی ہمشیرہ کی مدعیت میں تھانہ ہوتی میں درج کر لیا گیا ہے، جس میں ایک ملزم کو نامزد کیا گیا، ایف آئی آر میں کہا گیا ہے کہ ملزم فواد مقتولین کے مکان پر قبضہ کرنا چاہتا تھا، ملزم نے گھر کے اندر داخل ہو کر فائرنگ کی۔
