فیصل آباد: چیمپئنز ون ڈے کپ کا دوسرا ایلیمنیٹر میچ بارش کے باعث منسوخ کردیا گیا۔
چیمپئنز ون ڈے کپ کے دوسرے ایلیمنیٹر میچ میں آج لائنز اور مارخورز کا مقابلہ ہونا تھا لیکن بارش اور گیلی آؤٹ فیلڈ کی وجہ سے ٹاس بھی نہ ہوسکا۔
لیگ میچوں میں تین کامیابیوں کی بدولت مارخورز کو فائنل میں رسائی مل گئی۔ لیگ مرحلے میں صرف ایک فتح کی وجہ سے لائنز کی ٹیم ایونٹ سے باہر ہوگئی۔
واضح رہے کہ چیمپئنز ون ڈے کپ کے فائنل میں اتوار کو پینتھرز اور مارخورز کی ٹیمیں مدمقابل آئیں گی۔
یاد رہے کہ پہلے ایلیمنیٹر میں لائنز نے اسٹالینز کو 12 رنز سے شکست دے کر ٹورنامنٹ سے باہر کیا تھا۔
ایلیمنیٹر میں لائنز کی جانب سے دیے گئے 264 رنز کے تعاقب میں اسٹالینز کی ٹیم 49.4 اوورز میں 251 رنز پر آؤٹ ہوگئی تھی۔
کپتان محمد حارث کی 30 اور جہانداد خان کی 36 رنز کی اننگز رائیگاں گئی تھیں۔
خیال رہے کہ اس سے قبل پینتھرز نے مارخورز کو شکست دے کر فائنل میں رسائی حاصل کی۔
