کراچی : جوڈیشل مجسٹریٹ جنوبی عدالت میں پسند کی شادی کرنے والی خاتون کا شوہر کے ساتھ جانے سے انکار کردیا۔
تفصیلات کے مطابق کراچی کی جوڈیشل مجسٹریٹ جنوبی عدالت میں پسند کی شادی کے کیس میں نیا موڑ آگیا۔
پسند کی شادی کرنے والی خاتون کا شوہر کے ساتھ جانے سے انکار کردیا ، جس کے بعد اغوا کے مقدمے میں عدالت نے ملزم محمد عدنان کی بریت کی درخواست مسترد کردی۔
وکیل ملزم نے عدالت کو بتایا کہ کورٹ میرج کرنے والی مناہل کے والد نے محمد عدنان اور اس کے خاندان اغوا کے جھوٹا مقدمہ درج کروایا۔
ایڈووکیٹ لیاقت علی گبول نے کہا کہ مبینہ مغویہ خود بذریعہ جہاز کراچی سے لاہور پہنچی تھی، خاتون لاہور سے بذریعہ ٹیکسی تحصیل علی پور ضلع مظفر گڑھ پہنچی جہاں پر محمد عدنان کے ساتھ کورٹ میرج کی۔
وکیل کا کہنا تھا کہ مناہل نے نکاح کے بعد علاقہ مجسٹریٹ میں اپنے والد خلاف استغاثہ داخل کیا، مناہل نے بیان دیا کہ میں نے عدنان سے شادی کی ہے، میرا والد غیور عباس مجھے اور شوہر کو جان سے مارنے کی دھمکیاں دے رہا ہے۔
ملزم کے وکیل نے مزید بتایا کہ مناہل نو ماہ سے اپنے شوہر محمد عدنان ساتھ رہایش پذیر تھی ، مناہل کے والد نے علاقہ معززین کے ذریعے اپنے بیٹی کو معاف کیا تھا، مدعی نے داماد محمد عدنان کے ساتھ راضی لکھا کہ میں کسی قسم کی کوئی قانونی کاروائی نہیں کرونگا اور مناہل کی رخصتی اپنے گھر سے دوں گا۔
ایڈووکیٹ لیاقت علی گبول نے کہا کہ مدعی مقدمہ راضی خوشی اپنی بیٹی مناہل کو پنجاب سے لیکر آیا تھا،لیکن کراچی پہنچنے پر مدعی نے محمد عدنان کے خلاف اغوا کا مقدمہ درج کیا، مدعی مقدمہ نے اپنی بیٹی مناہل پر دباوٴ ڈال کر ملزم عدنان اور اس کے گھر والوں کو 164 کے بیان میں ملوث کروایا ہے۔
