راولپنڈی : مادر وطن پر اپنی جان قربان کرنے والے پاک فوج کے 3 جوان نائیک عنایت، لانس نائیک عمرحیات اور سپاہی وقار کی نمازجنازہ ادا کردی گئی۔
پاک فوج کے شعبہ تعلقات عامہ آئی ایس پی آر کی مطابق شہداء کی نماز جنازہ میں اہل علاقہ اور پاک فوج کے سینئرافسران و جوانوں نے شرکت کی، شہداء کو ان کے آبائی علاقوں میں فوجی اعزاز کے ساتھ سپرد خاک کیا جائے گا۔
آئی ایس پی آر کے مطابق خوارج گروہ نے گزشتہ رات افغان بارڈر سے باجوڑ میں دراندازی کی کوشش کی سیکیورٹی فورسز نے دراندازی کی کوشش ناکام بنادی۔
کارروائی میں5خارجی موقع پر ہلاک اور 4زخمی ہوگئے جبکہ فائرنگ کے تبادلے میں پاک فوج کے 3جوانوں نے جام شہادت نوش کیا۔
آئی ایس پی آر کا کہنا ہے کہ افغان حکومت خارجیوں کو اپنی سرزمین استعمال کرنے سے روکے، توقع ہے کہ افغان عبوری حکومت اس سلسلے میں ضروری اقدامات کرے گی۔
واضح رہے کہ گزشتہ روز پاک افغان سرحد باجوڑ میں خارجی دہشت گردوں نے دراندازی کی کوشش کی جسے سیکیورٹی فورسز نے ناکام بنا دیا تھا۔
سیکیورٹی فورسز کی مؤثر کارروائی کے نتیجے میں فتنہ الخوارج کے 5 دہشت گرد ہلاک ہوگئے جب کہ کارروائی کے دوران 4 خوارجی زخمی بھی ہوئے۔ خوارجیوں سے فائرنگ کے تبادلے میں پاک فوج کے 3 بہادر جوان بھی شہید ہوئے۔
