لاہور: وزیر اعلیٰ پنجاب مریم نواز کا کہنا ہے کہ عوام کیلیے انٹرٹینمنٹ ایونٹس کرواتے رہیں گے۔
مریم نواز نے 35 سال بعد 16 روزہ ہارس اینڈ کیٹل شو کے انعقاد پر مبارکباد پیش کرتے ہوئے کہا کہ 5 ماہ مسلسل محنت سے کامیاب کیا اور کامیاب شو ٹیم کی محنت کا ثبوت ہے۔
وزیر اعلیٰ نے کہا کہ ڈی جی پی ایچ اے، افسران اور عملے کو بھی شاباش دیتی ہوں، شو کی کامیابی دیکھتے ہوئے تفریحی تقریبات کا دائرہ صوبے بھر میں پھیلانے کا فیصلہ کیا ہے۔
انہوں نے بتایا کہ ہارس اینڈ کیٹل شو کی شاندار روایت جاری رکھیں گے، 9 سے 24 فروری تک پنجاب کے رنگ اُجاگر ہوئے شہریوں کو خوشی ملی۔
ان کا کہنا تھا کہ 13 انٹرنیشنل ٹیموں کی آمد سے پاکستان اور پنجاب کا عالمی امیج روشن ہوا، عید کے بعد لاہور ایکسپو سینٹر میں صنعتی نمائش کا انعقاد ہوگا۔
مریم نواز نے مزید کہا کہ سالوں بعد شہریوں نے لاہور میں شندور پولو، 7 روزہ نیزه بازی، بزکشی، تیر اندازی اور گھڑ سواروں کے سنسنی خیز مقابلے دیکھے، 20 بڑے ایونٹس میں بچے اور ہزاروں فیملیز شریک ہوئیں۔
’پنجاب کے صوفیانہ رنگ اُجاگر ہوئے، گلگت بلتستان کی ثقافتی سرگرمیوں کو فروغ ملا، روایتی کھانوں کی بہار رہی۔ چلڈرن فیسٹیول، ڈاگ شو، پھولوں، نادر اور نایاب گاڑیوں کی نمائش، رستم پنجاب دنگل کے سنسنی خیز مقابلوں نے ہارس اینڈ کیٹل شو کا لطف دوبالا کر دیا۔‘
