لاہور: مسلم لیگ ن کی چیف آرگنائزر مریم نواز کا کہنا ہے کہ فیض کی کچھ باقیات عمران خان کو سپورٹ کررہی ہیں۔
اے آر وائی نیوز کے مطابق مسلم لیگ ن کی مرکزی نائب صدر مریم نواز نے صحافیوں سے ملاقات میں غیررسمی گفتگو کرتے ہوئے کہا کہ میں نہیں سمجھتی کہ کوئی ادارہ عمران خان کو اب بھی سپورٹ کررہا ہے لیکن فیض کی کچھ باقیات اسے سپورٹ کررہی ہیں ان کے مفادات ہیں۔
انہوں نے کہا کہ عمران خان چھپ کر بیٹھا ہے آج کے بعد اس کی سیاست ختم ہوگئی ہے وہ جن کو توسیع دینے چلا تھا اب اس کے خلاف کارروائی کی بات کررہا ہے۔
مریم نواز نے کہا کہ جو جو کردار ہے ان کا احتساب ہونا چاہیے میاں صاحب نے بھی یہی کہا ہے اب نہ گریٹ گیم رہی اور نہ اب اس گیم کے کردار رہے ہیں۔
انہوں نے کہا کہ ووٹ کو عزت دو ہمارا بیانیہ ہے جس پر کھڑے ہیں دوسروں کا بیانیہ مجھے حکومت دو ہے جھوٹ جتنا طاقتور ہوجائے اس کی عمر وقتی ہوتی ہے۔
مسلم لیگ ن کی رہنما نے کہا کہ سائفر بیانیہ امریکا سے چلا محسن نقوی اور اب اختر لاوا پر آگیا ہے، آڈیو سامنے آئی ہے مرضی کے بینچ بنائے جارہے تھے۔
مریم نواز نے کہا کہ عمران خان اب عدلیہ کو ذاتی مقاصد کے لیے استعمال کرنا چاہتا ہے لیکن احتساب کے ادارے کمزور نہیں طاقتور ہوتے ہیں عدلیہ کو خود اس کا نوٹس لینا ہے ورنہ اس کا نقصان ہوگا۔
انہوں نے مزید کہا کہ میرا کام سیاسی ہے حکومتی نہیں ہے ن لیگ اتحادی حکومت کا حصہ ہے میں حکومت کا حصہ نہیں ہوں۔
