ایبٹ آباد: پاکستان مسلم لیگ ن کی چیف آرگنائزر مریم نواز نے پی ٹی آئی کے چیئرمین عمران خان پر تنقید کرتے ہوئے کہا کہ ’’جو کہتا تھا 300 ڈیم بناؤں گا، پورے پاکستان کو ڈیم فول بنا کر چلتا بنا۔‘‘
ایبٹ آباد میں مسلم لیگ ن کے تنظیمی کنونشن سے خطاب کرتے ہوئے مریم نواز نے عمران خان پر شدید تنقید کی، کہا کہ عدالت جب انھیں بلاتی ہے تو کہتے ہیں ٹانگ پر پلاسٹر ہے، لیکن جب جلسہ کرنا ہو تو پنڈی چلا جاتا ہے، تب پلاسٹر کچھ نہیں کہتا، عدالت جانے سے پلاسٹر نہیں تمھارے جرائم روکتے ہیں۔
مریم نواز نے کہا آپ کا دامن صاف ہے تو ویل چیئر پر عدالت جانا چاہیے، آپ کا دامن صاف نہیں، اب آپ کے سہولت کار نہیں ہیں جو آپ کو بچائیں گے، پہلے فرح شہزادی کو گرفتار کرائیں جو سب لوٹ کر چلی گئی، آپ کی بیگم 5،5 ہیروں کی انگوٹھیاں پہنتی ہیں پہلے ان کی گرفتاری ہونی چاہیے۔
مریم نواز نے کہا کہ شاہ محمود قریشی کل ٹی وی پر فرما رہے تھے کہ نواز شریف کے ساتھ زیادتی ہوئی، اعتراف جرم کا شکریہ لیکن یہ بھی بتا دیں کہ نواز شریف کو نکالا کس نے۔
انھوں نے کہا کہ نواز شریف کو جس گروہ نے نکالا اس کا سرغنہ عمران خان ہے، صرف اعتراف جرم کافی نہیں اپنے لیے سزا بھی تجویزکریں۔
