لاہور: وزیراعلیٰ پنجاب مریم نواز نے ہونہار اسکالر شپ اور لیپ ٹاپ اسکیم کے حوالے سے طلبا کو بڑی خوشخبری سنادی۔
تفصیلات کے مطابق وزیراعلیٰ پنجاب مریم نوازکی زیر صدارت اجلاس میں ہائر ایجوکیشن سے متعلق اہم فیصلے کرلئے گئے۔
وزیراعلیٰ پنجاب نے دیگر صوبوں کے طلبہ کیلئے ہونہار سکالر شپ اسکیم کی منظوری دے دی اور دیگر صوبوں کے طلبہ کے لئے بھی پنجاب کی طرح اہلیت کا یکساں معیار مقرر کردیا۔
وزیراعلیٰ مریم نوازنے پنجاب میں طلبہ کیلئے لیپ ٹاپ کی تعداد بڑھا کر 1لاکھ 10ہزارکر دی ، پنجاب میں سیکنڈ ائیر، تھرڈ اورفور تھ ائیر کیلئے ہونہار اسکالر شپ کی باضابطہ منظوری بھی دی۔
وزیراعلیٰ مریم نواز نے ہونہار اسکالرشپ اور لیپ ٹاپ اسکیم کے طلبہ کیلئے ہیلپ لائن کی ہدایت کرتے ہوئے لیپ ٹاپ حاصل کرنے کے لئے کم از کم 65 فیصد اہلیت مقرر کرددی۔
اجلاس سے خطاب کرتے ہوئے مریم نواز نے کہا کہ ہونہار اسکالرشپ ،لیپ ٹاپ ہر بچے کا حق اورحکومت کی ذمہ داری ہے، تعلیم اور یوتھ قوم کی حقیقی انویسٹمنٹ ہے، دل چاہتا ہے ہر بچے کو لیپ ٹاپ ملے۔
ان کا کہنا تھا کہ لیپ ٹاپ اور ہونہار اسکالرشپ دیگر صوبوں کے طلبہ کا بھی حق ہے، آزاد کشمیر، جی بی، بلوچستان ، کے پی سمیت دیگر صوبوں کےطلبہ بھی ہمارے بچے ہیں، میرٹ پر آنے والا ہر بچہ اچھے کالج میں اپلائی کرے فیس ہم دیں گے۔
وزیراعلیٰ پنجاب نے کہا کہ ماں کی طرح سوچتی ہوں، ہربچے کی قسمت بدلنا چاہتے ہیں، ہونہار اسکالر شپ کیلئے جو پنجاب کا معیار ہے وہی دیگرصوبوں کے طلبہ کیلئے مقرر کیا جائے گا۔
ان کا مزید کہنا تھا کہ طلبہ کیلئے کسی بھی اسکیم میں فنڈز کی فراہمی رکاوٹ بننے نہیں دی جائے گی۔
