باغ آزاد کشمیر : مسلم لیگ ن کی چیف آرگنائزر مریم نواز نے کہا ہے کہ ٹرمپ کے ساتھ کشمیر کا سودا کرنے والے کو قوم معاف نہیں کریگی۔
آزاد کشمیر باغ میں جلسہ عام سے خطاب کرتے ہوئے انہوں نے کہا کہ امریکی صدر ڈونلڈ ٹرمپ کے ساتھ بیٹھ کر کشمیر کا سودا کرنے والے شخص کو قوم کبھی معاف نہیں کرے گی۔ جس شخص کے پاس کارکردگی نہ ہو وہی یہ حرکتیں کرتا ہے۔
مریم نواز کا کہنا تھا کہ جو ہمارے جنگی جہازوں کو جلائے کیا وہ ہم میں سے ہوسکتا ہے؟ کوئی کتنا بھی غصے میں ہو، مخالف ہو کوئی اپنے ملک کو آگ نہیں لگا سکتا۔
جو ہمارے شہداء کی توہین کرتا ہے ہم بھی ان کا احترام نہیں کریں گے، قوم شہداء کی توہین کرنے والوں کو عبرت کا نشان بنا کر چھوڑے گی۔
مریم نواز کا کہنا تھا کہ نومئی کے واقعات کی وجہ سے شہداء کے ورثاء کی آنکھوں میں آنسو آئے، جس نے شہداء کے ساتھ یہ سلوک کیا وہ جس بنکر میں بھی چھپے قوم اسے کبھی معاف نہیں کرے گی۔
ن لیگ کی چیف آرگنائزر نے کہا کہ سال دوہزار اٹھارہ میں دھاندلی سے اقتدار میں آنے والی جماعت آج وہیں واپس چلی گئی جہاں سے آئی تھی۔ نون لیگ کو توڑنے کی خواہش کرنے والوں کی اپنی جماعت کرچی کرچی ہوگئی۔ جو کہتا تھا میں ان کو رُلاؤں گا وہ آج خود صبح و شام رو رہا ہے۔
انہوں نے کہا کہ اسی کی جماعت کا وزیراعظم آزاد کشمیر اس کیخلاف گواہی دے رہا ہے، نواز شریف کے کئی دشمن آئے اور کئی گئے، جو کہتا تھامیں اکیلاہی کافی ہوں، آج اکیلاہی بیٹھا ہے۔
