وزیر اعلیٰ پنجاب مریم نواز کا کہنا ہے کہ جلاوطنی میں پاکستان کی بہت یاد آتی تھی۔
پنجاب کلچر ڈے کی تقریب سے خطاب کرتے ہوئے وزیر اعلیٰ پنجاب مریم نواز نے کہا کہ جب سعودی عرب میں بارش ہوتی تھی تو مجھے وطن کی بارش یاد آتی تھی۔
انہوں نے کہا کہ بارش کے بعد پنجاب کی مٹی سے اٹھنے والی خوشبو کو یاد کرکے میں روتی تھی، میں پہلے پاکستانی پھر بلیو بلڈڈ پنجابی ہوں۔
مریم نواز نے کہا کہ پاکستان خوبصورت ملک اور پنجاب خوبصورت صوبہ ہے۔
علاوہ ازیں انہوں نے کہا کہ پاکستان کے ڈیفالٹ کی بات ہورہی تھی آج ہر طرف ترقی ہے۔
انہوں نے کہا کہ ایک سال میں پاکستان اور پنجاب میں ترقی آگئی ہے، وطن کی خدمت کا جذبہ رکھنے والی قیادت موجود ہے اس لیے ترقی ہورہی ہے۔
مریم نواز نے کہا کہ میری ذمہ داری ہے کہ 15 کروڑ لوگوں کو بنیادی سہولتیں فراہم کروں، دنیا ہمارے ملک کی طرف دیکھ رہی ہے، سرمایہ کار آرہے ہیں۔
