لاہور: نائب صدر مسلم لیگ (ن) مریم نواز کی طبیعت ناساز ہوگئی ہے، اور انہوں نے اپنی تمام سیاسی سرگرمیاں منسوخ کردی ہیں۔
ترجمان ن لیگ مریم اورنگزیب کی جانب سے جاری بیان میں بتایا گیا کہ مریم نواز کی طبیعت ناساز ہے، انہیں تیز بخار اور گلے میں شدید درد ہے، مریم نواز نے اپنا کرونا ٹیسٹ بھی کرایا ہے، جس کی رپورٹ تاحال موصول نہیں ہوئی ہے۔
مریم اورنگزیب کے مطابق ڈاکٹرز نے نائب صدر مسلم لیگ (ن) کو مکمل آرام کا مشورہ دیا ہے، اسی بنا پر انہوں نے اپنی تمام سیاسی سرگرمیاں منسوخ کردی ہیں۔
مریم اورنگزیب نے بتایا کہ مریم نواز شریف طبیعت کی ناسازی کے باوجود لاہور ہائی کورٹ بھی گئیں، جہاں انہوں نے میڈیا سے گفتگو میں پیپلز پارٹی کو آڑے ہاتھوں لیتے ہوئے کہا تھا کہ ایک طرف لوگ آئین و قانون کی خاطر جدوجہد کر رہے ہیں، دوسری طرف لوگ چھوٹے سے فائدے کیلئے بیانیے کو روند رہے ہیں، چھوٹے سے عہدے کیلئے جمہوری جدوجہد کو بڑا نقصان پہنچایا گیا۔
مریم نواز کا کہنا تھا کہ سینیٹ میں اپوزیشن لیڈر کا چھوٹا سا عہدہ ہے، اپوزیشن لیڈر سینیٹ کا عہدہ مل جاتا تو ہم نے کونسی حکومت بنا لینی تھی، آپ کو چھوٹا سا عہدہ چاہیئے تھا تو نواز شریف سے مانگ لیتے۔
مولانا فضل الرحمان کی طبیعت ناساز
واضح رہے کہ گذشتہ شب سربراہ پی ڈی ایم مولانا فضل الرحمان کی بھی طبیعت ناساز ہوئی تھی، ترجمان جےیو آئی کی جانب سے جاری بیان کے مطابق مولانا فضل الرحمان دو دن سے بخار میں مبتلا ہیں، انہوں نے اپنا کرونا ٹیسٹ کرایا ہے، جو کہ منفی آیا ہے۔
ترجمان جے یو آئی کے مطابق ڈاکٹرز نےمولانا کو سیاسی سرگرمیاں ختم کرکے مکمل آرام کا مشورہ دیا ہے، مولانا فضل الرحمان ڈیرہ اسماعیل خان میں اپنی رہائش گاہ پرموجود ہیں۔
ترجمان جے یو آئی کا اپنے بیان میں کہنا تھا کہ فضل الرحمان طویل جدوجہد کےبعد تھک گئےہیں اور آرام کررہے ہیں۔
